Belicokeme izinga kwi-food & wine tasting
BAHAMBE bengayivali imilomo abantu ebebesemcimbini wokunambithwa kwamawayini nokudla ( wine & food tasting) eRichards Bay Yacht Club, ngentundabebhekene yewayini eliqanjwe ngegama leSilo samaBandla uGoodwill Zwelithini, obekuthi ngaphambi kokuba balikluvele ezingilazini bakhuleke bathi “Bayede”, bese belithi qhabu.
Lo mcimbi obungempelasonto edlule ubusezingeni eliphezulu kwazise izidlo beziyibhamama, kuhlangene izinhlanga zonke zaleli zwe, zithokoza ndawonye njengoba kungunyaka wokukhumbula uMnu Nelson Mandela owayegqugquzela ubunye ezizweni zonke.
Ubuhlelwe ngobuciko nguNkz Lindiwe Dube, waKwaDlangezwa, ezibambele mazinyo, engenabo abaxhasi. Umcimbi uqale ngezikhathi zasemini, kukhona nabebezokhangisa ngemikhiqizo yabo eyahlukene, abenza imisebenzi yezandla, abakhangisi bengqephu, njalonjalo.
Izihambeli bezihlangatshezwa esangweni yizintokazi ebezivunule ziconsa ngemvunulo yesintu, zikwemukela ngokumamatheka okunemfudumalo, zikunike izingilazi zokuba uyonambitha amawayini anhlobonhlobo abesematafuleni enziwe yizinkampani ezahlukene.
Ubufike unambithe noma yiliphi olithandayo, kangangoba lithe liyozilahla kunina abanye “besebemnandi”.
Umkhiqizo wamawayini kaNkk Nerusha Sadapal yiwona obugqamile. Lawa mawayini abizwa ngoBayede kanti ahlukene ngezinhlobo. Kukhona iCabernet Sauvignon, Sauvignon Blanc, Merlot neRed Blend, onke asayinwe yiso iSilo. UNkk Sadapal uthi wafikelwa umqondo wokuba kubizwe amawayini akhe ngegama loNgangezwelakhe emuva kokubona ukuthi uyinkosi esithandayo isizwe sayo nefuna abantu bayo bathole imisebenzi. “Uma ubheka emqaleni wala mabhodlela, agqize ngobuhlalu entanyeni esibuthenga komama abenza ubuhlalu, bazuze imali. Lokhu kusho ukuthi sivule amathuba emisebenzi, neSilo samaBandla siyaziqhenya ngaso," kusho uNkk Sadapal.
Umculo ubugijima ngemithambo yegazi. Ukudla bekuphekwe yizitshudeni ezenza izifundo zehospitalty eMfolozi FET College, eSikhaleni - bekugqame ukudla okufana namaribs, imifino, nokudla kwesintu. Kubuywe kwantwezwa ngesikebhe echwebeni laseRichards Bay. ULindiwe ekhuluma neLANGA uthe:
“Ngibonga ukuthi ube yimpumelelo lo mbukiso. Abakhangisi bafike ngobuningi, nabanemisebenzi yabo bakwazile ukuyidayisa. Ngisacela komasipala bakithi ukuba ngonyaka ozayo bafake isandla ezintweni ezinjengalezi ezithuthukisa umphakathi ezingacebisi mina.” ephetha
Ngibonga ukuthi ube yimpumelelo lo mbukiso...