SIFUNA OMASIPALA ABAZOSITHUTHUKISA
MHLELI: Lapha KwaZulu-Natal (Shakaland), sifuna kube nomasipala abane abanamandla futhi abanomnotho ozothuthukisa umphakathi ngendlela elinganayo.
Njengoba kukhona iDurban Metro (iTheku), sifuna ihambe ibanga elikhulu ize ihlangane nomasipala abakhele uMasipala wesiFunda i-Ilembe; okuyiNdwedwe, yiKwaMaphumulo, KwaDukuza neMandeni bese ligwinya nabanye omasipala abaseduze.
Lokhu siyobe sikwenzela ukunciphisa igebe lempilo. Bheka nje ngaphansi kukaMasipala iTheku, izindawo eziningi zibhekelelwa kangcono ngoba kunezinsiza nentela eqoqwayo (njengama- rate) engcono uma uqhathanisa noMasipala waKwaMaphumulo uwodwa.
Lolu hlelo olukhona njengamanje, luyafana nolwamaBhunu lweBantustan, lapho abasemakhaya bethuthukiswa ngendlela engafani nabasemadolobheni njengabelungu namaNdiya.
Isibonelo: Uma kulungiswa umgwaqo emaNdiyeni nakobelungu, kufakwa itiyela, kodwa uma ulungiswa emakhaya kobantu kufakwa inkwali kuphele kanjalo.
Uma ubheka igebe lokungalingani libanga amahloni kule Ningizimu Afrika. Abasebenza emigwaqweni yaseThekwini bahola ngaphezu kuka-R2 500, abasebenza kweyasemakhaya bahola ngaphansi kakhulu kuka-R1 000. Lokho kubi, kuyenyanyeka ngoba uma singena ezitolo sithenga ngenani elifanayo futhi ezokuthutha zasemakhaya ziyadula.
Ezindaweni eziningi zasemakhaya kawukho ugesi, kodwa ukhona kuzona zonke ezihlala abelungu, amaNdiya namakhaladi.
Omunye umasipala ongaba yi- metro, kungahlanganiswa omasipala boThukela, aboMzinyathi nabakhele isifunda iMajuba, njengeNewcastle. Kungaphinde kuhlanganiswe uMasipala wesiFunda iKing Cetshwayo, uMkhanyakude neZululand, kube yi- metro ezokuba nomnotho.
UMasipala wesiFunda Ugu nawo uhlanganiswe neHarry Gwala noMgungundlovu kwakhiwe i- metro ezokuba namandla ekuthuthukiseni umphakathi. Lolu shintsho lungasiza kakhulu ukuthuthukisa izindawo zasemakhaya ngesivinini, hhayi lolu nyawo lonwabu okuhanjwa ngalo.
Okubaluleke kakhulu wukulethwa kwamafemu nengqalasizinda (njengolayini besitimela) ezovula imisebenzi ezindaweni zasemakhaya, kuphele ukunqwabelana kwabantu emadolobheni. #support_KwaZuluNatal_for_independence ! #ShakalandIsMyCountry.