INJABULO ENIKELELWA NGOTHISHA INDLU
KUSIZE ukungenelela kweSouth African Democratic Teachers’ Union (Sadtu) ukunciphisa usizi lwesaguga saseMzondi, eNgwavuma - esihlala sodwa - ebesingenayo indlu yokulala.
UNkz Mankanini Mdluli (85), unikwe indlu enamagumbi amabili yile nyunyana ngoLwesihlanu. Uyakhelwe ngokuhlanganyela ngamagatsha ale nyunyana ngaphansi kwesifunda saseNgwavuma. Ivulwe ngokusemthethweni nguNkz Zodwa Zwane, oyisekela likasihlalo wale nyunyana, KwaZulu-Natal. UNkz Zwane ubonge isenzo samagatsha ale nhlangano ngokubhekelela abantu abafana noNkz Mdluli.
“Namuhla sizovula ngokusemthethweni indlu kagogo Mdluli ngemuva kokuba abanye ozakwethu behlanganile baphuma nento ephathekayo. Ngaphandle kwale ndlu, sizomshiya negilosa, umbhede wokulala nezinye izinto ezibalulekile. Kasiqali ngogogo Mdluli ukusiza, kodwa baningi.
"Lokhu sesikuthatha njengento okufanele ihlale yenzeka nsuku zonke. Sizimisele ngokuqhubeka nokusiza umphakathi ngezidingo ezibalulekile, njengazo nje izindawo zokufihla ikhanda,” kusho uNkz Zwane.
UNkz Mdluli wehlulekile wukuzibamba, wakhala ngesikhathi enikwa ukhiye wendlu yakhe. Uveze ukuthi ubeselahle ithemba ngokuthi uyoke abe nendlu yokulala esezingeni elifana nale.
“Ngiyamangala ukuthi yimina lo osezolala endlini yalolu hlobo ekubeni ngihlale endlini eyinhlekisa kusuka ebusheni bami.
"Kalingivumanga izwe ngoba ngashonelwa yizingane zami zisencane. Bengiyinhlekisa kwabanye omakhelwane ngoba bekudingeka ukuba ngivuke ngime ngezinyawo uma imvula ina. Ebusika bengiququdwa ngamakhaza.
"Ngiyathokoza kakhulu ngengikwenzelwe ngothisha ngoba bashintshe impilo yami yenhlupheko yeminyaka. Ngifisa sengathi bangaqhubeka basize nabanye abafana nami ngoba sibaningi esidinga usizo lokwakhelwa izindlu,” kusho uNkz Mdluli.