Ubuhlungu bomphimbo bungadala ezinye izifo
KUSUKELA kusasa ngoLwesibili, yisonto lomkhankaso wezinsuku eziwu-7 wokuxwayisa ngohlobo lwesifo senhliziyo, iRheumatic Heart Disease, umsuka wayo oweyamaniswa nayo i-rheumatic fever lena.
YINI I-RHEUMATIC FEVER?
Lokhu wubuhlungu obuqaqambayo emalungwini amathambo, yinhliziyo, yisikhumba, ngisho nobuchopho imbala! Lesi sifo siyingozi, singaphetha ngokuba isiguli sidlule emhlabeni.
Incazelo yegama lalesi sifo ( definition) iyakuveza ukuthi imvamisa sihlasela izingane futhi imbangela yaso iba wukuhlaselwa yi- bacteria yohlobo lwe streptococci. Lokhu kwenzeka kubantwana abaphakathi kweminyaka yobudala eyisi-5 kuya kweyi-17 kanti sibonakala emuva kwezinsuku ezingama-20 umntwana ephethwe wumphimbo.
Ingxenye eyodwa kwezintathu zesibalo sabahlaselekayo kuyenzeka ubuhlungu bomphimbo bungavezi izimpawu zokungenwa yirheumatic fever.
IMBANGELA YAYO
Ngokuvamile i-rheumatic fever idalwa yi- bacteria yesigaba se-A Streptococcus. Le bacteria yiyona edala umphimbo obuhlungu.
I-rheumatic fever idala isimo sokuba umkhonto ugwaze ekhaya njengoba umzimba uhlasela izicubu zawo. Lokhu kwenza kuqaqambe umzimba wonke nokuba wuphawu olusheshe lubonakale kongenwa yiyona.
Nakuba kungeyizo zonke izinhlobo zobuhlungu bomphimbo eziholela ekuhlaselweni yi-rheumatic fever, ukuvela kwezimo ezidlebelekayo - impilo yesiguli ize ibe sebucayini - kungagwemeka uma udokotela esheshile ukuwelapha umphimbo onalolu hlobo lwe- bacteria.
ABASENGCUPHENI YOKUNGENWA YILESI SIFO
Lokhu okulandelayo ngezinye zezimo ezibeka umntwana engcupheni yokuhlaselwa yilesi sifo:
Umlando waso emndenini: Izingxenye ezithile zolibofuzo zingakwenza ube sengcupheni yokungenwa yilesi sifo.
Uhlobo lwe- bacteria olukhona: Kunezinhlobo ze- bacteria ezibangela lesi sifo ukudlula ezinye.
Izimo ezisendaweni yokuhlala imvamisa emazweni asilele emuva kwezentuthuko, njengokuminyana kwabantu.
IZIMPAWU
Uma umntwana wakho enomphimbo obuhlungu uhambisana nalokhu okulandelayo, phuthuma umyise kudokotela: Izindlala ezivuvukele. Isikhumba esiqubukayo, sibheje sibe bomvu. Wubunzima bokugwinya. Amakhovula ashubile, anegazi. Ukwenyuka kwezinga lokushisa komzimba eliwu-38,3 celsius noma ngaphezulu.
Amathansela avuvukele anombala obomvu kumbe anamabala amhlophe noma anobovu.
Amabala amancane abomvu olwangeni ( roof of the mouth).
Yikhanda elibuhlungu. Wukucanuzela kwenhliziyo nokuphalaza.
EMINYE YEMIPHUMELA YE-RHEUMATIC FEVER
Nxa sezikhona lezi zimpawu esezibaliwe, ziyabelesela kuze kuphele izinyanga noma yiminyaka imbala. Esinye isifo esinzima esivamise ukulandela lapho kuba ngesenhliziyo. Ezinye izinkinga kungaba yilezi ezilandelayo: Wukumniyana komthambo omkhulu inhliziyo ephaka ngawo igazi elihlanzekile ukuba liye emzimbeni wonke. Lokhu kubizwa nge- aortic valve stenosis.
Wukuvuza kwawo lo mthambo omkhulu, bese lokho kuholela ekubeni igazi ligeleze liphambane nehlombe. Lokhu kubizwa nge- aortic regurgitation.
Wukulimala kwezikhwepha noma yimisipha yenhliziyo. Lokhu kungadala ukuba inhliziyo iphelelwe ngamandla ingabe isakwazi ukumpompa kahle igazi. heart