Uzibangele isigcwagcwa unozinti weBucs
USredojevic usikaze ukumkhipha eboza
USEZIDALELE isigcwagcwa kozakwabo uWayne Sandilands ongunozinti we-Orlando Pirates njengoba kuvela ukuthi kabasamethembi futhi bafuna aqheliswe ezintini.
IBucs kayiyivulanga kahle imidlalo yeligi njengoba ibambane neHighlands Park engomakoti ngo-1-1 kowe-Absa Premiership ngoMgqibelo ebusuku e-Orlando Stadium, eSoweto. Igoli leHighlands kube wumkhonto ogwaze ekhaya kaGladwin Shitolo, kwathi eleBucs kwaba yiphenathi kaJustin Shonga.
USandilands uphinde waba yihlaya njengoba eshumpuze ibhola abeliphaselwe nguShitolo, lakhalakathela enethini.
USandilands bekuvele kungafanele ukuba aqale lo mdlalo, ungene ngoba kulimele uBrilliant Khuzwayo. UKhuzwayo ulimale ezinsukwini ezimbalwa ngaphambi kwalo mdlalo.
ILANGA lithole ukuthi uSandilands uvimba nje, kunabadlali vele abebeshaya amakhala ngokunikwa kwakhe ijezi kwazise bayamazi ukuthi wenza amaphutha avele alimaze ikilabhu.
Kuthiwa emuva kwalo mdlalo, abadlali bebemgxeka emakhoneni bethi kufanele angabuyiselwa nje esikimini okungcono kungavimba uSiyabonga Mpontshane kuze kubuye uKhuzwayo.
Kuthiwa bebeze basho ukuthi kabasamethembi.
UMilutin “Micho” Sredojevic ocija iPirates, uveze imizwa yakhe ngesenzo sikaSandilands.
“Kunzima ukukwamukela okwenzekile, ikakhulukazi kuyena ngoba usebenze kanzima kula masonto angu-6 edlule, sekuvele kuzokwenzeka into enjena.
"Nakimina kube nzima ngoba bengingazi noma ngimkhiphe yini kodwa ngibheka nokuthi sizomosha isikhala sokushintsha.
"Kuzofanele simeseke bese sikuqinisekisa ukuthi kaliphinde lenzeke iphutha elinjena,” kusho uSredojevic.
Uthi iHighlands ibingazile ukuzodlala, ibizopaka ibhasi nje kuphela. U-Owen da Gama ololonga iHighlands, uthi iPirates ibiphezu kwabo.
Isiyonke imiphumela ye-Absa Premiership imi kanje: Celtic 2, Chippa 0; Maritzburg 0, Arrows 2; Pirates 1, Highlands 1; AmaZulu FC 1, Baroka FC 0; Leopards 1, Polokwane 0; Cape Town City 2, SuperSport 0; Wits 3, Free State 0; Sundowns 1, Chiefs 1.