Uthuthuva kujamelene i-Sadtu neNatu
Izinyunyana zisolana ngenkohlakalo
KUPHAZAMISEKE ukufunda ezikoleni ezingaphansi kwesifunda sezemfundo KwaDukuza ngoLwesibili ngenxa yokubhekana ngeziqu zamehlo okuphakathi kosondonzima bezinyunyana zothisha, iSouth African Democratic Teachers Union (Sadtu) neNational Teachers Union (Natu).
Othisha abangamalungu alezi zinyunyana bashiye phansi oshoki bayoqhinqa ngaphandle kwamahhovisi esifunda KwaDukuza ngoba bengaboni ngasolinye odabeni oluthinta ukumiswa kwabahloli nakolomqondisi wezemfundo kulesi sifunda.
INatu ifuna umqondisi (esinqume ukuligodla igama lakhe), ashiye ngoba imsola ngenkohlakalo.
I-Sadtu yona ifuna kuxoshwe abahloli ababili, oweNatu noweSadtu ( ILANGA linawo amagama abo), ngoba ibasola ngenkohlakalo ehlanganisa ukudayisa izikhundla nokuqasha abantu abangamalungu eNatu (.
Isimo besishubile njengoba lezi zinyunyana bezihlukene amaqoqo amabili, abanye othisha bengaphakathi emagcekeni amahhovisi becula amaculo omzabalazo kanti abanye bebesesangweni, nabo besho ezabo iziqubulo.
Ngisho uhamba emgwaqweni ongenela khona KwaDukuza, izi- ngane zesikole bezisaphazeke umgwaqo njengoba ezinye zidedelwe ekuseni kanti ezinye zinikezwe izincwadi ngalo uLwesibili, zaziswa ukuthi zingalubhadi esikoleni njengoba othisha besa-bhekene nale nkinga.
ILANGA liyibonile enye yezincwadi ebibhalelwe abazali ngesinye sezikole esisondelene nakhona KwaDukuza.
UMnu Doctor Ngema, ongunobhala weNatu esifundeni Ilembe, uthi ngeke baze basuke kula mahhovisi engakakhishwa umqondisi.
Uthi lokhu bakusho ngoba ziningi izinto ezenzeka ngaphansi kwakhe, okubalwa kukhona ukuphedlela amalungu eSadtu izikhundla emnyangweni.
“NgoMsombuluko besinomhlangano nomqondisi siyokhuluma naye ngalolu daba. Sithe singazelele, kwagasela amalungu eSadtu aphaza- misa lowo mhlangano, alimaza nempahla ngaphakathi ehhovisi lesifunda. Afike eyiqulu asihhahhameza, ethi akayi ndawo umqondisi.
“Lokhu kwenza sibone ngokusobala ukuthi inhloso yawo wukumvikela ngoba ayazi ukuthi uwaphendlela izikhala njengoba naye eyiSadtu. Ngikhuluma nje, kunezikhala eziwu-7 okukhishwe abantu kuzona ngoba kuphendlelwa asebekhokhile. Kumanje ehhovisi lesekhethi, eNdwedwe, abahloli ababili sebesusiwe ngoba kukhona asebethenjiswe lo msebenzi,” kusho uMnu Ngema.
UMnu Mthembeni Zuma ongusihlalo weSadtu KwaDukuza, uthi bona bafuna kwenziwe ubulungiswa, kumiswe laba bahloli ababili abanesiqiniseko sokuthi yibona abathinteka enkohlakalweni.
Uthi bafuna umnyango wezemfundo ubeke icala amalungu eNatu “abethumbe” umqondisi ngoMsombuluko ngoba efuna avume ukuthi udayisa izikhala.
“Thina esikwenzile wukuyovimba amalungu eNatu abethumbe umqondisi emahhovisi, efuna ukumvumisa ngenkani ukuthi udayisa izikhala.
"Eqinisweni nje lilonke, laba bahloli ababili sinobufakazi esibuthole ezikoleni bokuthi bayathinteka ekudayisweni kwezikhundla ngoba befuna kungene amalungu abo. Sike sahambisa uhlu lwezikhalo phambilini namanje olungakaphendulwa.
"Laba bahloli bafuna ukufaka amalungu eNatu, amanye awo anezikhundla kwi-IFP), okuyinto engeke sayimela neze leyo.
"Sizomvikela umqondisi futhi sifuna umnyango ubeke icala laba abebelapha ngoMsombuluko bemthumbile,” kusho yena
Okhulumela uMnyango wezeMfundo KwaZulu-Natal, uMnu Muzi Mahlambi uthe, umnyango uhlale ukusho ukuthi uma kukhona onobufakazi benkohlakalo ayisolayo akeze ngaphambili nayo ukuze umnyango uzoluphenya.