USOLINAS UGXEKA I-PSL
Ukhala ngokucinana kwemidlalo yezakhe
UMQEQESHI weKaizer Chiefs ugxeka iPremier Soccer League (PSL) ngokungabacabangeli abadlali bakhe.
IChiefs izotheleka KwaZulu-Natal namuhla ngoLwesine njengoba izobhekana neMaritzburg United kowe-Absa Premiership kusasa ngoLwesihlanu ngo-20h00 eHarry Gwala Stadium, eMgungundlovu.
IChiefs iya kulo mdlalo nje ngoLwesibili kusihlwa ibambane ngo-1-1 neBaroka FC koweligi ePeter Mokaba Stadium, ePolokwane.
UGiovanni Solinas ololonga iChiefs ugxeka iligi ngokungabacabangeli abadlali bakhe njengoba ethi amakilabhu ababhekana nawo asuke ekade enesikhathi sonke sokuphumula kodwa ezakhe azilitholi ithuba lokuphumula. “Le nto eyenziwa yiligi angiyiqondisisi ngempela ukuthi iyenzelani. Imidlalo yethu icinene kodwa izimbangi zethu lutho zilokhu ziphumule. "Sifike sadlala iMTN8 ngoMgqibelo, sadlala neBaroka ngoLwesibili, ngoLwesihlanu sidlala neMaritzburg yinto enjani nje leyo, ibizwa ngani? "Asilitholi ngisho ithuba lokujima sihlale sisendleleni,” kubalisa lo mqeqeshi. Nokho uthi akanavalo ngeMaritzburg yize izobe iphumule kangcono kunezakhe. “Silindele umdlalo onzima kwiMaritzburg ngoba iyagijima. Kuzofanele sibe nendlela yokonga umoya ngoba igcine ngeSonto yona uku- dlala, ibe nesikhathi sonke sokuphumula.
"Sizokwenza ngakho konke okusemandleni ukuthi siyawunqoba lo mdlalo,” kusho uSolinas ongakanqobi mdlalo weligi.
UFadlu Davids ololonga iMaritzburg uthi siyamkhathaza isimo ababhekene naso.
“Isimo esibhekene naso sinzima. Asikanqobi mdlalo obekuyinto ebesingayilindele.
"Kodwa ngithi amaphaphu phansi, izinto zisazolunga.
"Yizinkinga ezincane nje esibhekene nazo okuzothi kungalunga zona bese izinto zibuyela esimweni, siqale sinqobe imidlalo.
"Umdlalo weChiefs ngeke ube lula ngoba lapho efika khona ihlale yesekwa kodwa sizozama ngawo wonke amandla ukuwunqoba lo mdlalo,” kusho uDavids.
Imidlalo ye-Absa Premiership isiyonke ngempelasonto iqhathwe kanje: KUSASA NGOLWESIHLANU EHarry Gwala Stadium: Maritzburg United vs Kaizer Chiefs 20h00. NGOMGQIBELO EPeter Mokaba Stadium: Polokwane City vs Baroka FC Baroka FC 15h00. ECape Town Stadium: Cape Town City FC vs Golden Arrows 18h00.
ESisa Dukashe Stadium: Chippa United vs Black Leopards 20h15.
EBidvest Stadium: Bidvest Wits vs SuperSport United 20h15. NGESONTO EKing Zwelithini Stadium: AmaZulu FC vs Free State Stars 15h00.
EFree State Stadium: Bloemfontein Celtic vs Orlando Pirates 15h00.