UPetronella we-The Queen kwi-OPW
Uphinde waqokwa nakwiMzansi Viewers Choice Awards
UTHEMBSIE Matu olingisa indawo kaPetronella emdlaweni owuchungechunge, iThe Queen, angase abonakale eshayela uhlelo lwemishado, i-Our Perfect Wedding kuMzansi Magic.
INGASE ibambe uhlelo lwemishado, i-Our Perfect Wedding, intandokazi yomlingisi weThe Queen, uThembsie Matu, odlala indawo kaPetronella.
UThembsie - ongomunye wabalingisikazi abathandwayo eNingizimu Afrika - ngoLwesibili umenyezelwe nabalingisi abaqokwe emunxeni weBest Actress emci-mbini weMzansi Viewers Choice Awards, eqale ngonyaka odlule.
ILANGA lihabule ukuthi njengoba uKayise Ngqula ongumethuli we-OPW ezithwele, kungase kube nguThembsie ombambelayo.
Ekhuluma naleli phephandaba uThembsie ngemuva kokuthola izindaba zokuqokwa kwakhe, uzwakalise okukhulu ukujabula wabe esenxenxa abantu ukuba basheshe baqale ukumvotela. Akafunanga ukucacisa mayelana nokubamba kwi-OPW.
“Engingakusho nje, wukuthi izinto zingihambela kahle kakhulu okwamanje. Inkampani engiqale ukubonakala esikhangisweni sayo iCell C isanda kungibiza, kukhona engizokwenza nayo kanti kuningi okunye abantu abasozokubona ngokuhamba kwesikhathi,” kusho yena.
UThembsie uqokwe nabalingisi okubalwa kubo uLinda Sebezo (odlala uLillian kwiSibaya), uRami Chuene (Gracious Mabuza kwiThe Queen), Moshidi Motshegwa (Malefu kwiThe River) noLesego Marakalla (Rachel Kunutu kwi-Skeem Saam).
Abanye abaqokiwe eminxeni eyahlukene kubalwa uWarren Masemola (Stukkie kwiRing of Lies), Hamilton Dlamini (Banzi kwiSethembiso), Mduduzi Mabaso (ozakhele udumo ngendawo kaSuffocate ayidlala kwiRhythm City), Masoja Msiza (okumanje uthakaselwa ngendawo kaNkunzi kuZalo) noKhulu Skenjana (Mingus kwiLockdown) abaqokwe emu- nxeni weBest Actor.
IDistruction Boys iqokwe eminxeni emithathu okubalwa kuyona oweFavourite Artist or Group, iRising Star noweSong Of The Year ngengoma yabo ethi “Omunye”. Emunxeni wePersonality of the Year kuboshelwe uPapa Penny, uBonang Matheba, uSomizi Mhlongo, uKagiso Rabada noNomzamo Mbatha.
UDudu Khoza ubanga nozakwabo, uSelby Mkhize oKhozini FM, ko-weRadio Personality kanti abanye abaqokwe nabo kubalwa uDJ Fresh, u-Anele Mdoda noThuso Motaung.
UDJ Black Coffee uphinde waqokwa futhi emunxeni weFavourite DJ, lapho ebanga khona noMaphorisa, uTira, uPrince Kaybee noMs Cosmo.
Abantu sebengaqala ukuvotela izintandokazi zabo ngokulandela imigudu efanele yokuvota.
UMzansi Viewers Choice Awards uzoba mhla ka-24 kuLwezi (November) eGoli.
Okhulumela uMzansi Magic, uBongi Metsing, uthe okwamanje kabakamqoki ozovala isikhala sikaKayise kwazise kusabambe uNomusa Buthelezi.
Uthi bazoqhubeka nokubashintsha abethuli bohlelo kuze kube bathola ozovala isikhala ngokugcwele.