Bangqongqise izimoto zomnyango
Bebekhala ngokungathuthuki kwemigwaqo
SIMANZONZO isimo edolobheni laseMatatiele, e-Eastern Cape njengoba amalungu omphakathi evuke umbhejazane ashisa amahhovisi omnyango wezemisebenzi yomphakathi eMaluti nezimoto zawo ezintathu.
Umsindo uqubuke ngoLwesibili lapho amalungu omphakathi nabashayeli bezimoto begasele kuMasipala waseMatatiele, befuna incazelo ngokuhamba ngonyawo lonwabu kwezinhlelo zokuthuthukiswa kwemigwaqo yasemakhaya njengoba sekuphele iminyaka belokhu bethenjiswa wuhulumeni ukuthi izolungiswa.
Bakhala nangokuthi uNgqongqoshe wezokuThutha esifundazweni, uNkz Weziwe Tikana, uzifikele mathupha kuleya ndawo ngenyanga edlule, wabethembisa ukuthi isimo semigwaqo yasemakhaya sizoba ngcono njengoba uhlelo lokuthuthukiswa kwayo selukubona, kalusekho ngaphansi komnya-ngo wemisebenzi yomphakathi. Ekhuluma neLANGA uMnu Teboho Stemere, omele umphakathi, uthe selokhu azalwa eminyakeni engaphezulu kuka-35, bakhule ngaphansi kwesimo esibi semigwa-qo.
Lokhu uthi kubaphoqile ukuba basukume balwe ngo-2014. “Saluphakamela lolu daba salokhu sethenjiswa, kodwa kuze kwafika isikhathi lapho ungqongqoshe ezifikela khona wethembisa futhi wabeka nesikhathi sokuthi luzoqala nini uhlelo lokuthuthukiswa kwemigwaqo,” kusho uMnu Stemere. Uthi lolu hlelo luhambe kancane kakhulu njengoba ngesinye isikhathi bekuye kuphele udizili namasondo emishini yokusebenza, kuhlale kungase- tshenzwa ngoba kuthiwa kusayolandwa udizili eBhisho kumbe eMthatha.
“Kusicasule kakhulu lokhu, kodwa sangadikibala, salokhu sizamile ukuthi sihlangane nezikhulu zomkhandlu ebezilokhu zibhala zicisha. Zifike kithina emuva kokushiswa kwamahhovisi esingahlangene nakho ngoba thina esikwenzile, wukuyovala amahhovisi omnyango wezokuthutha,” kusho uMnu Stemere.
Ngesikhathi behlukana nezikhulu zikamasipala, bebenqume ukuthi bazobuye bahlangane nazo ngoLwesithathu (izolo), ekuseni. ILANGA belikhona endaweni obekuzohlanganelwa kuyona, kodwa kuze kwashaya isikhathi sokuloba zingabonwa. Okhulumela umasipala, uNkz Olwethu Gwanya, uthe bebetsheliwe ukuthi umkhandlu kamasipala uzohlangana neminyango ethintekayo kubhekwe amasu okuxazulula izinkinga zomphakathi.
Uthe nakuba engakhulumeli umnyango, kodwa kayikho into ethi izethembiso ezazithenjiswe umphakathi kazenzekanga, kepha ukhala ngokuthi zihamba kancane, kodwa wona uyaqhubeka nokushisa imishini ethunyelelwe ukuba kusetshenzwe ngayo ukuze uhlelo lokuthuthukiswa kwemigwaqo luhambe ngokushesha.
Uphinde wathi bewumasipala banqume ukuthi kuzoba nomunye umhlangano kusasa ngoLwesihlanu. Okhulumela uMnyango wezokuThutha e-Eastern Cape, uMnu Unathi Binqose, uthe impela uNkz Tikana wethembisile ukuxazulula izinkinga zemigwaqo kodwa engabhekisile kubantu baseMatatiele kuphela. “Sixolisa kakhulu-ke ukuthi kuye kwaba nezihibe kulolu hlelo, kodwa lokho kakuvumeli abantu ukuba bashise izakhiwo zikahulumeni uma kukhona abangahambisani nakho,” kusho uMnu Binqose.
Uthe uhlelo lokwakhiwa kwemigwaqo lungene ngaphansi komnyango wabo ngoMbasa (April) ngoba bezama ukonga imali yokuqasha izinkontileka. “Kunokuningi okusafanele ukuba kwenziwe, kodwa ngingakudalula ukuthi iMatatiele iseqhulwini njengoba sesichithe imali ebalelwa ku-R100 million, sithenga imishini lena esishiswa manje,” kusho uMnu Binqose.
Uthe basazoqhubeka nokuxhumana nomphakathi. Okhulumela amaphoyisa aseMatatiele, uCapt Raphael Motloung, uthe bekungakaboshwa muntu, kodwa akhona amacala azovulwa. ILANGA lingakudalula ukuthi ukuthula akukabi khona endaweni, sekujutshwe amaphoyisa ukuba abhekane nezimo zodlame kuleya ndawo.