KUMAPEKETWANE KUMASIPALA
KUXABENE ubendle kuMasipala waseNdwedwe njengoba kuthiwa kalukho uzinzo kwazise ubuholi bakhona buhlukene phakathi.
Kuzokhumbuleka ukuthi ILANGA like labika ngokungabikhona kozinzo ngemuva kokuqubuka kwezindaba zokuthi imenenja yalo masipala, uMnu Patrick Cele, isolwa ngokuhlangana noMnu Bheki Buthelezi oyi- human resources manager ozikhuphulela umholo.
Ezinyangeni ezimbili ezedlule, uMnu Cele noMnu Buthelezi bahlaliswe ekhaya emuva kophenyo olususwe wukuvela kokuthi uMnu Cele uhola imali engaphezulu kokumele ayihole. Ngokuthola kweLANGA, umasipala uqale wabhalela uMnu Cele noMnu Buthelezi, wathi mabachaze ukuthi kungani kungafanele babhekane namacala ngalokhu.
Namakhophi ezinkontileka obekudingeka ukuba asebenze njengobufakazi kulolu daba kuthiwa abengasatholakalali. UMnu Cele kuvele ukuthi bekufanele ngabe uhola u-R852,706 00 ngonya- ka, kodwa ubehola u-R947,451 00 okuyiwona osuse uthuthuva.
Imithombo yaleli phephandaba engaphakathi kulo masipala, iveza ukuthi uMnu Cele akaphiki ukuthi umholo wakhe ukhuphukile. Kuthiwa uthi ukukhushulwa kwawo wudaba aluxoxe noMnu Nkosinathi Chili, oyimeya.
ILANGA lipotshozelwe ukuthi esikhundleni sokuba uMnu Cele ayothamela icala abebekwe lona, ufike esefaka incwadi yokwesula, uMnu Chili obemisiwe - ngoba kusolwa ukuthi uyabandakanyeka ekukhushulweni kweholo lemenenja - wabuyiselwa.
Kuphinde kwavela nokuthi uDkt Mbuyiseni Ntuli, obebambe njengemenenja, njengoba uMnu Cele ebemisiwe, wehlisiwe kulesi sikhundla njengoba kuthiwa uMnyango wezokuBusa ngokuBambisana nezoMdabu KwaZuluNatal, ukuchithile ukubamba kwakhe ngoba kuthiwa akanaso isipiliyoni esanele ekuphathweni komasipala.
“Kutholakale ukuthi bekungafanele umkhandlu kamasipala umise imeya njengoba kufanele kube wumnyango owenza lokho. Lokhu kuholele ekubeni imeya ibuyiselwe esikhundleni sayo,” kusho umthombo. Okhulumela uMnyango wezokuBusa ngokuBambisana nezoMdabu KwaZuluNatal, uMnu Msawakhe Mayisela, uthe imeya beyingahlaliswanga ekhaya wumkhandlu kamasipala kepha beyihlaliswe yiqembu layo i-African National Congress (ANC).
“Singakuqinisekisa ukuthi imeya ibuyele emsebenzini futhi iqhubeka nawo njengokujwayelekile futhi siyaqinisekisa ukuthi noMnu Cele ufake incwadi yokusula,” kusho yena. Uvumile nokuthi uDkt Ntuli uyekisiwe ekubambeni esemenenja ngoba engenaso isipiliyoni esanele.
Kuze kwashaya isikhathi sokuloba uMnu Khonzuyise Ngidi ongusomlomo walo masipala, engatholakali, ucingo lwakhe lukhala lungabanjwa. UMnu Chili uvumile ukuthi uyasebenza kulo masipala ngemuva kokumiswa ngokungekho emthethweni. Uthi ukhulume nongqongqoshe ngalolu daba, wabe esembuyisela ngoba bekungekho bufakazi obumhlanganisa nalolu daba.