KUSOLWA OWE-AFRO NGOKUNUKUBEZA
USETHEMBE umphumela kadokotela umdansi weqembu Amadada, elingaphansi kwenkampani kaMthokozisi "DJ Tira" Khathi, i-Afrotainment, osolwa ngecala lokunukubeza ngokocansi ingane (13) yakwamakhelwane.
Lo mdansi - esingeke simdalule ngenxa yezizathu zomthetho - ukhulume imizuzwana naleli phephandaba izolo ngoLwesithathu njengoba ebevele eNkantolo yeMantshi yaseThekwini ngaleli cala. Zimkhalele ngoMsombuluko kanti amalungu omndeni athi lesi sigameko senzeke ngeSonto emini.
Kuze kwashaya isikhathi sokuba kuvalwe, uMshushisi Nsiki Qhunyiswa, ebambene phezulu nommeli walo mdansi, uMnu Shameer Goolabjith. Ummeli ubekhala ngokuthi ummangalelwa usehlale amahora angaphezulu kwawu-48 evalelwe ngaphakathi, walwela ukuba isicelo sebheyili silalelwe khona izolo.
“Kumele sikhumbule amalungelo akhe ummangalelwa njengoba umthetho ukubeka ngokusobala ukuthi umsulwa kuze kube imantshi imthola enecala,” kusho uMnu Goolabjith. Ukulalelwa kwesicelo sebheyili kuhlehliselwe inamuhla (Lwesine) ngo-08h00. Ummangalelwa uzifikele nommeli wakhe okungacacanga ukuthi ukhokhelwe nguyena noma yinkampani yakhe, i-Afrotainment. Okhulumela le nkampani, uMnu Senzo Shezi, utshele izintatheli ukuthi sibahlukumeze kakhulu lesi sigameko.
“Kubuhlungu okwenzekile kodwa sizoba naye u...(egagula lo mdansi) kuze kube kuphuma isinqumo senkantolo,” kuqhuba yena. Akathandanga ukuphumela obala ukuthi ngubani okhokhele ummeli. Uthe banethemba lokuthi inkantolo izomthola emsulwa lo mdansi.
Ngakolunye uhlangothi, udadewabo wesisulu - esingeke simdalule ukuvikela ingane - uthi ngokwabo bebengafuni ngisho silalelwe isicelo sebheyili. “Kusiphatha kabi ukuthi umsolwa anikezwe ithuba lokuyohlala ngaphandle kodwa ingane yethu ibe ihlukumezekile ngalokhu. Osaziwayo bebephume ngobuningi ukuyokweseka lo mdansi, okubalwa uDladla Mshunqisi, iDistruction Boyz, uTipcee nabanye.