Ubesabisa ngokuzibulala othembise umshado ena-16
Indodana ithembise ukuzibulala uma uyise engavumi ithembise
KUBIKWA ukuthi kuqhume o- congratulation ngesikhathi uSiyacela Namandla Dlamuka (16) efika esi-koleni afunda kusona uGrade 8, iNsikayendlu High School, emuva kokuba ethembisane umshado nesinqandamathe sakhe seminyaka emibili uThando Mathe-bula (16) waseNkandla ofunda uGrade 9.
Lezi zithandani kuthiwa bezithembisana umshado - esiphihlini somcimbi obunamakhekhe amathathu obusebandleni likaSiyacela, iCorinthians Christian Church in Zion, oNdini.
Leli bandla liphethwe nguMfu Mthandeni Dlamuka onguyise kaSiyacela. Ekhuluma neLANGA uMfu Dlamuka, uthe ubone kubalulekile ukuba avume ukusiza indodana ya-khe ithembise uThando umshado ngoba imsabise ngokuthi izozibulala uma engavumi.
“Ufike kimina wangitshela ukuthi kunentombazane athandana nayo afuna ukuyishada ngokukhulu ukushesha ngoba yena akafuni ukwenza izinto zikamajolana,” kusho uMfu Dlamuka.
Uveze ukuthi ubenamakhosikazi awu-5 ngonina kaSiyacela ongasekho emhlabeni.
Uthi indodana yakhe imtshele ezimpempeni ukuthi njengoba zonke izingane zakwabo zinonina, nayo ifuna ukuba nonina. USiyacela uyavuma naye ngowakhe umlomo ukuthi ukuba uyise ubengafuni ukumenzela lo mthembiso, ubezozibulala.
“Ngimtshelile ubaba ukuthi kangiyithandi le nto kamajola, yingakho-ke ngimtshelile ngentombi yami futhi ngiyafisa ukuthi nabanye abantu abasha bafunde kimina ukuthi bangalokhu beganga, ikakhulukazi abafana beshintshashintsha amantombaza- ne,” kusho yena.
Mayelana nokuthi ufuna unina njengezinye izingane zakwabo, ubengaqondile ukuthi uThando uzomenza unina ngokuthi amwashele, amphekele, amthume aphinde amthethise njengoba kwenza omama kepha bazosizana.
“Ngifuna ukuthi abeseduze kwami njengomuntu wesifazane engimthandayo. Kangisho ukuthi uzokwenza okwenziwa ngomama kepha ngizomphathisa okwenkosikazi yami njengoba nami ngizimisele ngokuba ngumyeni wakhe,” kusho uSiyacela.
Uthi akakholwa ukuthi usengahlangana nomunye wesifazane angamthanda ukudlula uThando.
USiyacela, obekade eyoshaya umazisi wakhe ngoLwesibili, uthi uzimisele ngokuba bashade ngokushesha, uma nje uyise esekwazile ukumhlanganisela imali.
Ngokusho kwemithombo ebeyihambele lo mcimbi, kuthiwa ubusezingeni eliphezulu njengoba noThando ebesegqokiswe umfaniswano wakuleli bandla.
Kuthiwa uphinde wathengelwa nenqwaba yezingubo osekumele azigqoke njengoba esefana nomuntu osezoba yinkosikazi yomuntu.
“Ngichithe imali engaphezulu kuka-R22 000 ngihlela lo mcimbi kanti u-R8 000 wayo ngithengele ngawo uThando izingubo ngoba sekumele agqoke ngendlela eyehlukile,” kusho uMfu Dlamuka.
Uthi kunemibandela yebandla okumele lezi zithandani ziyilandele ngoba ukuthembisana kwazo umshado kakusho ukuthi sezizocanasa, zijole noma kanjani.
“Kubalulekile ukuba baqhubeke baziphathe kahle, kwazise uThando uhamba noMkhosi woMhlanga. Nangale kwalokho, basebancane ngakho-ke ngingajabula uma bengazithiba unyaka noma emibili baqale bakhule ngokweminyaka,” kusho yena.
Umfundisi weSangweni Legumbi Christian Apostolic Church, okuyibandla likaThando, uMfu Sakheleni Ndlephiwe Ngubane, uthe uzwe ngabazali bakaThando ukuthi uyothenjiswa umshado.
“Ngithe uma ngizwa ngathumela umkhokheli wakhe ukuba ayokhuluma nabazali, nebala bangitshela ukuthi sebevumelene nonina womfana.
“Ngikhulume noMfu Dlamuka okuqinisekisile lokho. Siyakholwa wukuthi bazoyilandela-ke imigomo yebandla njengoba kusamele baqhubeke bazigcine,” kusho yena.
Uthi uphinde wabacacisela ukuthi kabathembisani ukuthi bayathandana nje kepha bathembisanela umshado, okuyinto yokuthi bayoze bahlukaniswe wukufa.
Ucingo lukanina kaThando beluvaliwe, kwaze kwashaya isikhathi sokuloba engatholakali.