Ushone nomzukulu ugogo obeyozilela indodana
KUDUMA amakhanda emndenini wakwaKhumalo eNzinga, eMpendle, emuva kokushona kwamalungu awo amathathu engozini yemoto kade eyolungisa indaba yesidumbu selinye ilungu elishonele esibhedlela.
Kule ngozi kushone uNkk Ntombizonke Khumalo (78) noNcebo Khumalo (1) kade beyolungisa indaba yesidumbu sikaMnu Zweni Khumalo (43).
ILANGA lithole ukuthi uMnu Khumalo ushone ngoLwesithathu olwedlule kade elaliswe esibhedlela ngemuva kokusha kanzima ekuqaleni kukaNhlangulana (Ju- ne), eshiswa yisitofu. Ngokusho kukaMnu Sphamandla Khumalo oyilungu lomndeni, unina (Nkk Khumalo), ufikelwe yizindaba zokushona kukamfowabo eseMgungundlovu. Uthi ngakusasa kuphoqeleke ukuba abuyele kwakhe kuyokhanyiswa amakhandlela.
“Behlelwe yingozi besendleleni bebheke ekhaya beyolungiselela ukuba kuzilelwe umfowethu. Kushone umama nengane kadadewethu kwathi amanye amalungu omndeni aphuthunyiswa esibhedlela isimo sawo sisibi,” kusho uMnu Khumalo.
Uthi kunzima ngisho ukuba bakhulume ngale nto ebehlele. “Besisaxakwe wukushona kukamfowethu kanti kasazi ukuthi ku- sazolandela ezinye izidumbu ezimbili. Kunzima ngisho ucabanga ukuthi ngoMgqibelo kuzobe kuklele amabhokisi amathathu egcekeni.
Kumanje sibambe umoya ngalawa amanye amalungu omndeni angeniswe esibhedlela,” kusho uMnu Khumalo.
UNkz Nonku Khumalo - naye oyilungu lomndeni - uthi isimo simuncu emdenini njengoba kunomunye umfowabo obehamba nonina emotweni okumanje usesimeni esibi esibhedlela nendodakazi yakhe.
Okhulumela amaphoyisa KwaZulu-Natal, uCapt Nqobile Gwala, uthe kuvulwe icala lokubulala ngokungenhloso, bekungakaboshwa muntu.