UHUDULWE AMADODANA ENDUNA OBULEWE
SIMANZONZO isimo emphakathini waseNgwebini, eNquthu, emuva kokushaqwa kwelungu lomphakathi phambi kwabantu emcimbini obungoMgqibelo layobulawa.
Umthombo weLANGA uthi kufike izinsizwa ezimbili, ezizalwa yinduna yendawo, zacela uMnu Boy Magubane ukuba kuphunyelwe ngaphandle, kukhona okumele kuyokhulunywa ngakho.
Uthi ngaphandle komuzi bekupake imoto emhlophe ebinezinsizwa ezingaziwa phakathi.
Utshele ILANGA ukuthi umphakathi kawuzange unake ukuthi kungase kwenzeke isimo esifana nalesi ngoba uMnu Magubane ubebizwa ngabantu bendawo.
Kuqale ukunakeka uma esehudulwa phansi, ephoqwa ukuba angene emotweni. Uthi konke lokhu kwenzeke nenkosikazi kaMnu Magubane ibuka.
“Umphakathi uzamile ukuyosiza kwase kuphuma lezi zinsizwa ebezisemotweni zaqhumisa isibhamu emoyeni.
“Zimthathile uMnu Magubane zahamba naye,” kusho umthombo.
Uthi kunezinsolo zokuthi la madodana enduna abesola uMnu Magubane ngokuba nesandla ekulahlekeni kwezinkomo zawo.
Uveze nokuthi sibuziwe nesiKebhe sendawo ngalokhu okwenzekile, sathi akukho esikwaziyo ngokulahleka kwezinkomo, kanjalo nesigameko esifana nalesi.
Umthombo uthi ngeSonto ntambama kuzwakale izindaba zokuthi isidumbu sikaMnu Magubane sitholwe komunye umfula oseMondlo, eVryheid.
“Isidumbu sitholwe singenawo amanxeba okudutshulwa, besinemihuzuko nje. Bekusalindwe umbiko kadokotela ozosihlola,” kusho umthombo.
Imizamo yokuthola imindeni ethintekayo kayiphumelelanga.
UCapt Nqobile Gwala usiqinisekisile isigameko sokuthunjwa kowesilisa oneminyaka ewu50 ubudala.
Uthe abasolwa ababili baboshwe eGoli ngoLwesibili, bazovela maduzane eNkantolo yeMantshi, eBabanango.
“Isidumbu sitholwe eMondlo kanti isigameko senzeke ngoMgqibelo ntambama. Kuvulwe icala lokuthumba nelokubulala,” kusho uCapt Gwala.