LIYAQHUBEKA ELABASOLWA NGOKUSUSA IZIBHELU
KULINDELEKE ukuba kuqhubeke namuhla ukulalelwa kwesicelo sebheyili sephoyisa, uthisha namalungu omphakathi abasolwa ngokuba nesandla ekusukeni kwezibhelu eziholele ekushisweni kwezakhiwo zomphakathi ngomlilo.
UMnu Siphosethu Ndlovu, oyiphoyisa elisebenzela ngaphansi kwesiteshi saseNgwavuma, nguMnu Sboniso Thwala, onguthisha eNkosi Mtshelekwane High School, nguMnu Thembelani Ntshangase oyilungu eliqavile kwi-African National Congress (ANC), nguMnu Galman Mathenjwa noMnu Menzi Mathenjwa, abangamalungu omphakathi, bakhalelwe ngamasongo kaS’gonyela emasontweni amabili adlule ngezinsolo zokuphehla udlame emphakathini, kwashaywa amaphoyisa maqede aphucwa izibhamu, okubikwa ukuthi namanje ezimbili zazo kazikakatholakali.
Kubuye kwacekelwa phansi izimoto zamaphoyisa, aqhunyiswa ngezimpama.
Laba basolwa ngokugqugquzela udlame oluphethe ngokuba kushiswe umuzi oyisitezi kaMnu Roman “Mabaleka” Mathenjwa ongundunankulu wesizwe sakwaMathenjwa ngoba esolwa ngokuba nesandla ekunyamalaleni kukaMnu Xolani “Malema” Mathenjwa obenguthisha eKuhlehleni Primary School.
Kubuye kwathungelwa ngomlilo amakotishi nesinye sezitolo zikaMnu Mathenjwa.
Sekuphele izinyanga eziwu-5 lo thisha enyamalele.
Izolo abasolwa bangene eNkantolo yeMantshi yaseNgwavuma bebukeka bekhululekile. Icala lihlehliselwe inamuhla.
Udaba lwezibhelu zaseKuhlehleni seluqale ukukhathaza nabazali babafundi bazo zonke izikole ezingaphansi kwale ndawo njengoba namanje lungekho uzinzo - izikole ziyaphazamiseka.
Selokhu kusuke izibhelu kule ndawo kuphume umphefumulo welungu lomphakathi okubikwe ukuthi lidutshulwe ngelinye lamasosha abebizelwe ukuyodambisa isimo ngemuva kokuba kushaywe amaphoyisa.