UZULUBOY UZONANDISA KWI-COMEDY KASHEMBE
ZIBONDIWE ohlelweni lwamahlaya, iComedy Picnic ehlelwa okokuqala ngqa eMgungundlovu, ngusomahlaya ongadinge kuchazwa kubathandi bamahlaya, uSimphiwe Shembe.
IComedy Picnic izokuba seKZN Botanic Gardens, eMgungundlovu mhla ka-2 kuMandulo (September) kusukela ngo-11h00 ekuseni kanti kuzoshiyelana inkundla abaculi, osonkondlo nosomahlaya.
UShembe uthe konke sekumi ngomumo ngalo mcimbi, wathi kuwona kuboshelwe izinkakha zaKwaZulu-Natal. “Yize eThekwini sekwenziwe ama- picnic amathathu, kodwa kuyaqala ukuba siyilethe eMgungundlovu.
"Lokhu sikwenziswe yinqwaba yabantu ebikhala ngokuthi kasiyiniki yona lolu hlobo lomcimbi. Yisona-ke lesi isikhathi sokuba bazibonakalise ukuthi bangakwazi yini ukuphuma bagcwalise iBotanic," kuqhuba uShembe.
Phakathi kosomahlaya abazonandisa kubalwa uCeleste Ntuli - wodumo lukaMaMthembu kwiSibaya - uSfiso Nene, uMdu Ntuli, uPastor Mjosty, uQatha, uJustice Kubheka, uNonto R, uMoemish, uFlymotion, uThenjiwe, Amawele aseChersterville, uTsoro noSimphiwe Shembe.
UDawn Thandeka King yena uzophatha uhlelo kanti uJoocy noZuluboy ( osesithombeni) bazonandisa ngomculo nelinye lamaciko akhona eMgungundlovu.
UShembe unxusa abantu ukuba baphume ngobuningi babo ukuyozizwela ubumnandi bamahlaya.
Amathikithi aseyatholakala eComputicket ngoR150 ajwayelekile, kube u-R200 esangweni awezicukuthwane atholakala ngo-R400.