ABAFUNDI BABHIKISHELE UMKHULEKO
USUSE umsindo, kwaphoqeleka ukuba kuphazamiseke ukufunda nokufundisa umkhuleko ofunwa ngabafundi baseNyamane High School, eNgwavuma.
Kusukela ngoMsombuluko, abafundi balesi sikole bebebhikisha, becula amaculo omzabalazo ngoba bethi makube khona umkhuleko ukuze kuzonqamuka ukufa kwabafundi eNyamane.
Silobe izolo ngoLwesithathu isimo singakashintshi. Abafundi bavumelane ngazwi linye kwelokuthi akekho umfundi zongena emagcekeni afunde ngoba besola ukuthi umkhuba ungaphakathi esikoleni ngokufa kwabafundi.
Bayisihlanu abafundi asebeshonile kulesi sikole ngokuzilengisa. Oka-6 usinde ngenxa yokuthi kukhona abambonile, bagijima banqamula intambo eseqala ukuzonela.
Kubikwa ukuthi kawukho ngisho nowodwa umkhuleko oseke wabakhona kulesi sikole selokhu kuqale izinkinga ngokushona kwabafundi.
Kuthiwa kunezinceku zendawo ebezizama ukungena ngenkani emagcekeni esikole zithi “ziyokhuza umoya omubi," okusolakala ukuthi ungaphakathi - ngemuva kokuba sekushone umfundi wesine - kwaba nabathile aba-sesigabeni sokuphathwa kwesi-kole abangavumanga ukuba angene la makholwa.
Inkonzo yomkhuleko igcine yenzelwe enkundleni yezemidlalo engaphandle kwesikole. Abafundi bathi sekufike lapho benengwa khona, umkhuleko kumele ube khona, uthisha, umfundi okanye ilungu lesigungu esilawula isikole ongafuni kukhulekwe, kuzofanele izinyawo zigcwale udaka.
“Siyazi ukuthi kufanele siqale ukuzilungiselela ukubhala izivivinyo, kodwa sithe ngeke sikwazi ukufunda ekubeni sifa ngendlela engaqondakali. Bonke ozakwethu abasishiyile bafe ngokuzilengisa.
“Sikhathazekile futhi ngeke sikwazi ukukubekezelela lokhu ngoba kungenjalo, kuzodinga ukuba sivalwe isikole, kuqalwe phansi kuqashwe othisha abazosivumela sithandaze futhi abazohlanganyela nathi.
“Siyakuqonda ukuthi kunothisha abangakholwa futhi abanye bakhonza kwezinye izinkolo kodwa iningi lethu lapha emakhaya singamaKrestu. Lapha ngaphakathi esikoleni sinothisha abangahambisani nokuba kukhulekwe njalo ekuseni.
“Konke lokho siyakubona, kodwa ngoba siyaphela, siyabanxusa ukuba bavumele abathandazi nezinyanga ukuba bangene emagcekeni esikole, kuhlanganwe kukhuzwe lo monakalo,” kusho omunye walaba bafundi.
Isimo sokushona kwabafundi ngendlela engaqondakali sikhathaza nomphakathi wendawo.
UMnu Zabazendoda Nyawo, oyilungu lomphakathi, uthe kumanje sebecabanga nokubakhipha abafundi ukuze sizovalwa isikole.
Inhloko yomnyango wezemfundo eMkhanyakude, uMnu Mjozi Motha, ithe itholile ukuthi isimo sishubile kulesi sikole futhi kumile ukufunda nokufundisa ngenxa yezinkinga eziqubuka kusona.
Okhulumela uMnyango wezeMfundo KwaZulu-Natal, uMnu Kwazi Mthethwa, uthe belungakafiki kuyena lolu daba.
Unxuse abafundi ukuba bakugweme ukususa imibhikisho ngoba kuyababambezela.