KUWE IQHAWE LOMZABALAZO
KUSHONE elayizolo lisemanzini elinye lamaqembu eliyibambe ishisa emzabalazweni wenkululeko yabampisholo eNingizimu Afrika, iPan Africanist Congress (PAC) emuva kokudlula emhlabeni kukaNkk Zondeni Veronica Sobukwe (91), obeyinkosikazi kaMnu Robert Sobukwe.
UMengameli wePAC - eyasungulwa nguMnu Sobukwe nabanye abaxebuka kwi-African National Congress (ANC) - uMnu Narius Moloto, uthe uNkk Sobukwe ushonele esibhedlela kuzosa kube wuLwesithathu lwayizolo.
“Sidabukile kodwa futhi siyabonga ngempilo yakhe ayiphile kahle futhi engumuntu onomgomo. Ubengumuntu ophikelelayo, oweseke umyeni wakhe nasekuhluphekeni, enaye njalo.
“Akakaze abe nokungabaza, wakhulisa abantwana yedwa ngoba umyeni wakhe wayevalelwe ejele yize wabuye waboshelwe ekhaya," kusho uMnu Moloto.
Nakuba ebengagqamile ezindabeni uNkk Sobukwe, kodwa kuvela ukuthi uhlonishwe ngomklomelo osemqoka kamengameli waleli lizwe, i-Order of Luthuli ngasekuqaleni konyaka ophezulu, emuva kweminyaka ewu-40 kwashona umyeni wakhe. Ngenxa yokuthi ubephila impilo engagqamile futhi nabezindaba bengazihluphi ngokwazi ngaye, le mininingwane elandelayo baningi emphakathini wamanje abazobe beyeshwama.
Ngokombhalo kasomlando, uThando Sipuye, ophume kwiKimberly City Info mhla ka-27 kuNtulikazi (July) 2017, uNkk Zondeni Veronica Sobukwe (uKaMathe) oshone eseneminyaka ewu-91, wazalwa mhla ka-27 kuNtulikazi ka-1927 eHlobane, ngaseVryheid.
Ushade noMnu Sobukwe mhla ka-6 kuNhlangulana (June) 1954.
Ngokwesiko lakwaXhosa, wethiwa elithi unguNosango.
Bathola abantwana abane: uMliswa, uDinisizwe, uDalindyebo noDedanizizwe. Kuthiwa ngisho esehlanganise iminyaka ewu-90, uNkk Sobukwe ubebonakala njalo esengadini yakhe.
Okunye ngaye wukuthi uphile impilo yokuzitshwa wuhulumeni wabamhlophe, kamuva nangowentando yeningi njengoba iqhaza lakhe nomyeni wakhe kungakhulunywa kakhulu ngalo.