Ibandla liya enkantolo kubangwa izikhundla
Umfundisi uxoshwa yikomiti
LUNGENA eNkantolo yesiFunda eMgungundlovu udaba lombango oshisa phansi wezikhundla e-African Gospel Church.
Lolu daba lufakwe nguMfu Maqhinga Dhlomo enkantolo ekhala ngokususwa kwakhe yikomiti laleli bandla eKranskop, lapho abengumfundisi khona, lamyisa eMgungundlovu, laphinda lamsusa eMgungundlovu lamyisa eMambulu, eKranskop.
Emuva kwalokhu limxoshile, kanti yena uthi ukuxoshwa kwakhe bekungekho emthethweni. Leli komiti lebandla liphinde lamisa uMfu Sakhephi Ndaba ekuphatheni ibandla laseShowe ekubeni imishini nezindonga zalo zimiswe nguyena, eliqala phansi ngezikhwepha zakhe.
Ngokomthombo waleli phephandaba, uma uMfu Ndaba ebuza icala lakhe, leli komiti kuthiwa livele lithi ophikisana nalo uzongena efrijini lasemakhazeni, ngakho mabenze elikushoyo, bangalokhu beqinisa amakhanda.
Ummeli kaMfu Dhlomo, u-Adv C. Mnguni, weCollin Msizi Mguni Incorporated, uthi lokhu kakukaze kwenzeke ngisho kwamadala eJudeni ukuba umfundisi ashovelwe kwamanye amagatsha aze axoshwe yikomiti.
Ngokusho kuka-Adv Mnguni, umthethosisekelo webandla uthi umfundisi uyoshintsha noma ashovelwe kwezinye izindawo uma kuhlale ingqungquthela yebandla kwase kuthathwa leso sinqumo. “Ngakho mina ngiyoveza ezithebeni zenkantolo ukuthi lokhu abakwenzile kuphambene nomthethosisekelo webandla obhalwe phansi.
"Ikilayenti lami lixoshwe ngusihlalo, kodwa uma ufunda umthethosisekelo webandla, kasikho isikhundla sikasihlalo, kukhona o- moderator.
"Lo sihlalo ukwenze lokhu ekhona uRev Nutu Gigaba okunguyena u- moderator owenza umsebenzi wokubhala incwadi eshintsha abefundisi emuva kwesinqumo esiphume engqungqutheleni," kusho u-Adv Mnguni.
Uthi bese kunezikhawu eziningana icala lingena enkantolo njengoba okokuqala bebefuna kuhlakazwe leli komiti.
“Inkantolo ibisizilalelile izethulo, into esilindele ukuba yenzeke kusasa (namhlanje) enkantolo, wukuba yethulelwe izizathu ezenza uMfu Dhlomo athi waxoshwa ngokungemthetho,” kusho u-Adv Mnguni. Imizamo yokuthola uvo lukaRev Gigaba, kayiphumelelanga.