BAGQUGQUZELA UBUMBANO KUBANTU BESIFAZANE
SIYANDA isibalo sabesifazane abahlanganyela ndawonye ngenhloso yokwenza okuthile okuya phambili.
IZulu Cherries Are Fabulous, yinhlangano yabesifazane eyakheke ngendlela engajwayelekile enkundleni yezokuxhumana, iFacebook, kodwa yagcina isidonse inqwaba yabanye.
Umsunguli waleli khasi, uMpume Mavundla, uthi ekuliqaleni kwabo leli khasi, babekade belisungulela abesifazane abahlala kude nasemakhaya ngenxa yomsebenzi, kodwa ngokuhamba kwesikhathi kwagcina sekushintsha konke lokho.
“Ikhasi belenzelwe abesifazane abayishiyile iKwaZulu-Natal balibhekisa eGauteng beyosebenza. Okwakusihlanganisile kakhulu wukwelulekana ngezinkinga esibhekana nazo uma siqhelelene namakhaya.
"Ngakho-ke bekuyingxenye yokunikezana uthando nokwesekana. Kuhambe isikhathi kwagcina sekushintsha njengoba sekuyikhasi lapho iningi lethu lithola khona ukusizakala ngoba sikubukile ukuthi izinkundla zokuxhumana zingakwazi ukusisebenzela nazo njengoba sesikwazi ukuxhumana ezweni lonke, sakhane,” kuchaza uMpume.
Uthi kulokhu bazobe benza umcimbi wokubonga nokugqugquzela bonke abantu abasizayo kuleli khasi, okuwumcimbi abawenza njalo ngonyaka.
“Siba nezikhathi lapho simema khona othile ozosichushisa emkhakheni wakhe, kuvulwe ithuba lokuphosa imibuzo. NgoMgqibelo sizobe sibonga laba bantu ngegalelo labo ngoba kabagcini ngathi, kodwa nasemphakathini bayasiza.
"Kunabesifazane abakhulisa izingane zabafana okufika isikhathi lapho kufuneka baziyale khona, kodwa uthole ukuthi kabazi ukuthi baqale kuphi. Njalo ngenyanga yamadoda, uNtulikazi (July), sibiza abesilisa abaqhamuka emikhakheni ehlukene ukuba bacobelelane nathi ngolwazi ngoba sicabanga ukuthi kakumele kugxilwe enganeni yentombazane kuphela, kodwa neyomfana iyadinga ukwakhiwa.
"Siba nabantu bemikhakha eyahlukene kusukela kwezomthetho, ezempilo nokunye, konke lokhu bakwenza mahhala,” kuchaza uMpume.
Umcimbi weZulu Cherries, uzoba ngoMgqibelo, kwephezulu, eProtea Edward Hotel,
eThekwini.