Kubonwa ngokusa ku-Aretha Franklin
KUBANJWE umoya ngomzwilili wase-United States of America (USA), u-Aretha Franklin (76), othathwa njengendlovukazi yomculo womphefumulo, i- soul, oyibambe cishe iminyaka ewu-50 eyedlule. Imibiko yabezindaba yaseUSA, ithi kumanje lo mculi usegcinwe endaweni yababuthaka kakhulu futhi okungasekho ithemba lo-kuba bayophinde balulame, i- hospice. Ngokusho kukaGwendolyn Quinn, obesakaza izindaba ngoAretha Franklin, baphuma bededelana abasondelene naye okubalwa phakathi kwabo osaziwayo endimeni yomculo njengoStevie Wonder noGlynn Turman, obengumyeni wakhe kusukela ngo-1978 kuya ku-1984, kanjalo nesishoshovu samalungelo abantu esidumile, uMfu Jesse Jackson. Nasezinkundleni zokuxhumana ingena ilakanyana imithandazo nemiyalezo yokukhuthaza phakathi kwayo okuneTweet ephuma kuMnu Bill Clinton oke waba ngumengameli waseUSA.
Kulowo myalezo uMnu Clinton uthe: “Njengabo bonke abantu emhlabeni, uHillary (umkakhe) nami sicabanga ngo-Aretha Franklin futhi silalele umculo wakhe obeyingxenye ebalulekile empilweni yethu iminyaka ewu-50 eyedlule." U-Aretha Louise Franklin wazalwa mhla ka-25 kuNdasa (March) 1942. Uhambo lwakhe luqale esemncane ecula i-gospel eNew Bethel Baptist Church, eDetroit. uyise uCL Franklin ayengumfundisi khona.
Ngo-1960 eneminyaka ewu-18, uqale umculo wokungcebeleka waqopha nenkampani iColumbia Records. Nokho uze wavelela lapho eseqopha umculo wakhe ne-Atlantic Records ngo-1967.
Phakathi kwamanoni adume umhla- ba wonke ngisho nakuleli, angesale ngaphandle lawa: I Say a Little Prayer, Respect, You make Me Feel Like A Natural Woman, Spanish Harlem, I never Loved A Man the Way I love You, Chain of Fools, Amazing Grace, nezinye.
Ukuba ngusondonzima kwakhe kwezomculo kufakazelwa phakathi kokunye wukuthi:
umculo wakhe wathengisa ngaphezulu kuka-75 million wamarekhodi emhlabeni wonke;
ungowesibili kwabesifazane ukufakwa ohlwini lweGMA Gospel Music Hall of Fame ngo-2012;
kwezezinkanyezi, i-Asteroid 249516 Aretha yethiwe ngaye ngo 2014;
uhlabane ngamaGrammy Award kwaze kwaba ka-18 emikhakheni eyahlukene yawo.
Ungomunye wabanandisa ngomculo mhla ka-20 January 2009 kubekwa uMnu Barak Obama njengomengameli wase-USA. Wethulelwe isigqoko yizinhlangano ezahlukene, wahlonishwa ngePresidential Medal of Freedom mhla ka-9 kuLwezi (November) 2005 ngasikhathi sinye noMnu Robert Conquest noMnu Alan Greenspan oke waba ngumengameli weReserve Bank yase-USA.