Akaziboni ebuyela emsakazweni
UTHI akaziboni ebuyela emsakazweni maduze u-Unathi Nkayi oke waba ngumsakazi weMetro FM, njengamanje ongelinye lamajaji omncintiswano i-Idols SA. U-Unathi uthi usesimeni esikahle ngokwempilo futhi uyathokoza ngendlela eqhubeka ngayo njengoba ebuye abe ngumethuli wohlelo lukamabonakude iShow Me Love, olukhonjiswa esiteshini esizimele iMoja Love.
Kuzokhumbuleka ukuthi ushiye emsakazweni ngonyaka owedlule ngemuva kokuba iMetro FM imemezele izinguquko zabasakazi abasha.
U-Unathi ubeshayela uhlelo lwasekuseni kwiMetro FM ngokubambisana noGlen Lewis, bobabili abashiyile ngemuva kwalezi zinguquko. Ekhuluma neLANGA, ukubeke kwacaca ukuthi ujabule emoyeni futhi usegxile nasemculweni wakhe.
“Ukushiya kwami emsakazweni kunginike nethuba elihle lokugxila emculweni - ngine albhamu esihloko sithi Brave True and Strong,” kusho lo mzwilili osezinhlelweni zokwenza umzungezo wamakhonsathi akhe okuqala emadolobheni ehlukene.
Uthi lona kuzoba wumzungezo wakhe wokuqala selokhu aqala ukucula. Uzoha- mbela izifundazwe eziyisithupha eqhulula amanoni amasha nalawo azakhele udumo ngawo.
“Kuzo zonke izindawo engizozihambela ngizobe nginikeza abantu okwehlukile futhi okuzobashiya bejabulile,” esho.
Imizungezo yamakhonsathi kaUnathi kulindeleke ukuba iqale ngomhlaka-18 kuNcwaba (August) eGoli, kanti uzoyiphothula eThekwini ngomhlaka-20 kuMandulo (September).
U-UNathi owaziwa ngokuhleka aze aphume izinyembezi, nokuba nozwelo ohlelweni lomncintiswano i-Idols SA, okhonjiswa kuMzansi Magic, osungena esigabeni sokuvota kwabantu, uthi ngesikhathi besahlunga limmangazile ikhono labaculi abangenelile baseThekwini naseCape Town.
“Minyaka yonke iTheku lihlale lenza kahle kulo mncintiswano kodwa kulo nyaka ngibone neCape Town ingenisa kakhulu.
“Lo nyaka uzomangaza kakhulu kulo mncintiswano. Angisakwazi ukulinda ukuba abantu bazikhe- thele izintandokazi zabo (abafisa ziqhubeke zihlale kulo mncintiswano). Lapho kuyobe kungasekho ezandleni zethu njengamajaji kodwa sekusezandleni zabantu abavotayo,” esho.
Kuzokhumbuleka ukuthi u-Unathi usanda kwehlukanisa nobengumyeni wakhe uThomas “Bad Boy T” Msengana osekhuze ibuya kwiMetro FM ohlelweni lwasemini alushayela noPearl Modiadie.
U-Unathi ucashunwe kweminye imithombo yezindaba ekucacisa ukuthi usekudlulisile ukwehlukanisa kwakhe noMsengana abesebeshade iminyaka engu14 naye, babusiswa ngezingane ezimbili.