Baningi abakwazile ukuvika i-flu
KUBONAKALA sengathi inqwaba yabantu baseNingizimu Afrika ikwazile ukuwuhlakaniphela umkhuhlane ohambisana nobusika kulo nyaka.
Imvamisa uma kuyisikhathi sawo umkhuhlane, uyamhlasela umuntu izikhawu eziningana ulokhu ubuya, size sedlule (isikhathi sawo).
Umbiko wocwaningo lwakamuva olwenziwe yinkampani yezempilo iPharma Dynamics, kubantu abayi-1837, abaneminyaka eyi-18 kuya phezulu, uveza ukuthi u-9% wabo awuzange nje uphathwe wumkhuhlane.
Kulolu cwaningo kutholakale ukuthi u-38% uhlaselwe wumkhuhlane kanye kule sizini. Kubantu abangu-32% kubikwa ukuthi umkhuhlane ubuye kabili, kwathi kwabangu-13% wabuya kathathu.
Kukhona-ke isigejane sabantu esiwu-8% okuthiwa sona sithwale kanzima ngenxa yomkhuhlane kule sizini - kulo 8% kuthiwa uhlasele uphindelela izikhathi ezisukela kwezine kuya phezulu.
Ngokusho kukaNkk Annemarie Blackmore, oyi-Antimicrobial Product Manager ePharma Dynamics, labo bantu abebebanjwe phansi wumkhuhlane izikhathi eziningi kungenzeka ukuba banezinye nje izifo ezingamahlalakhona, ezenza amasosha omzimba abe buthaka, bese kwanda amathuba okuba bangenwe kalula ngezinye izifo. Ngenhlanhla eNingizimu Afrika kubikwa ukuthi umkhuhlane ohlasele khona kule sizini awubanga mubi kakhulu njengomkhuhlane onzima ohlasele eBritain nase-US, obizwa nge-Aussie flu, ebuye yaziwe ngokuthi yi-H3N2. I-H3N2 kubikwa ukuthi ibihlasele kakhulu ngonyaka owedlule eNingizimu Afrika.
Uhlobo lomkhuhlane olungelubi kakhulu okubikwa ukuthi beluhlasele eNingizimu Afrika kulokhu yilolo olubizwa nge-influenza A (H1N1), olwaziwa kakhulu ngoku- thi yiSwine flu.
Ngesikhathi iPharma Dynamics yenza lolu cwaningo, ithole ukuthi inqwaba yabantu yenze ngokusemandleni ukuzinakekela ngenhloso yokungangenwa wumkhuhlane.
U-45% wabantu kubikwa ukuthi ubuzinakekela ngokudla amaimmune- boosting supplement. U-36% wona ubudla ama- vitamin, bese kuthi u-27% ubudla izithelo nemifino.
Njengoba ubusika bungakapheli golokoqo, okusho ukuthi umkhuhlane awukapheli nawo, uNkk Blackmore uthi abantu mabazinakekele ngokuba baqikelele inhlanzeko - okuhlanganisa ukungabolekani izitsha zokudlela, yizipuni, yizimfologo, amabhodlela amanzi, okokugcoba umlomo, amathawula nokunye.
Enye yezinto athi ingenza kube lula ukuba abantu bahlaselwe yiflu, yi-stress esingelashwa. Kubikwa ukuthi i- stress esingabhekiwe singawehlisa amasosha omzimba, okwenza umuntu ahlaselwe kalula yizifo.