Ugqugquzela imbokodo ukuba ingazithambisi
UZookey uthi kade kwasa enethwa yizimvula
UNGOMUNYE wabesifazane esingasho singananazi ukuthi uyinsimbi kayigobi njengoba kuke kwaba nesikhathi lapho abaningi bebezitshela ukuthi sekuphelile ngaye.
UZukiswa Qwethakazi “Zookey Zarling‚” Vutela (41), osakaza uhlelo i-Iconic Weekend ngo14h00-18h00 ngoMgqibelo nangeSonto kwiVuma FM, ungowesifazane oseke wathwala kanzima empilweni nongalindela ukuthi lokhu kumenze abe nenhliziyo embi, kodwa uthi wukukhula kanzima nokudlula ekuhlukunyezweni okumenze waba nozwelo nakwabanye abantu besifazane, ikakhulukazi izingane.
Le ntokazi, ehlale phansi yaxoxa neLANGA - njengoba kuyinyanga yabesifazane - kayifihli ukuthi ike yadlula ekuhlukunyezweni ngokocansi isencane.
UZookey ukhulele eSwazini, wafunda eSt. Michaels okuyisikole okwakufunda kusona izingane zezishoshovu zepolitiki kwazise naye abazali bakhe babedingiselwe kuleliya lizwe njengoba bebekwezepolitiki.
Yize engathandisisi ukukhuluma ngezinto ezimbi eziningi ezenzeke empilweni yakhe, kodwa uyavuma ukuthi zike zamnetha wangazi ukuthi uzothathani ayihlanganise nani, njengoba eke waphelelwa nawumsebenzi isigubhukane kweminye imisakazo abesezakhele igama kuyona eThekwini.
Le ntokazi, eshade ineminyaka ewu-19 ubudala, iqale ukusebenza ineminyaka ewu-17 esiteshini esizinze eThekwini, i-East Coast Radio, yasebenza njengeMarketing Manager kwaSABC, yaya nakwiGagasi FM.
Ithi ukuphelelwa wumsebenzi ingalindele, ngesikhathi isebenza kwiGagasi 99.5 FM, yikho okuyinike umfutho wokuvuka izithathe, yaba nesibindi sokungena nasemabhizinisini.
UZookey ngumnikazi wenkampani, iBrand and Media Management, esebenzisana namaciko, ihlele imicimbi emikhulu futhi ibe nezinhlelo zokubuyisela emphakathini.
“Kangifikanga kalula lapho ngikhona, kudingeke ukuba ngidlule ezintweni eziningi ezinzima kodwa ngiyakholwa wukuthi yizo lezi zinto ezingibeke lapho ngikhona namhlanje,” kusho yena.
Uma uZookey ekhuluma, kuyavela ukuthi vele uyiciko ngokukhuluma nangokubhala njengoba ethi uke wasebenza njengombhali wezinkulumo ebhalela iSilo uZwelithini kaBhekuzulu, esebenza ngokubambisana noNkk Thembi Myeni.
Uke wahlala eCzech Republic esebenzisana noNkk Nomusa Dube-Ncube lapho ethi ubesebenzisana nabaculi bakuleli, ebavulela amathuba okuyokhombisa ngethalente labo kuleliya lizwe.
Uke wabhala incwadi, iThe Soil That Bears My Roots, athi uyibhale ngenhloso yokufundisa ngokukhulisa abantwana, yindlela yokunakekela abantwana ababonakala bewuhlupho nokunye okuningi.
“Ngingumama oselahlwe ngobaba bezingane kwaba kabili, ngazikhulisela, ngakho-ke ngiyazi ukuthi kunzima kangakanani ukuzikhulisela izingane uwedwa.
“Yingakho ngize ngavula nezinkulisa lapho abantu besifazane abakhulisa izingane ngabodwana bethola khona isaphulelo,” kusho yena.
Uthi uyaluthokozela kakhulu uhlelo alwethula kwiVuma FM ngoba edlala kakhulu umculo owelapha umphefumulo kulona.
“Ngaphambi kokuqala uhlelo lwami, ngiyakhuleka kanti noma sengiqedile ngiyakhuleka ngoba isifiso sami esikhulu wukuba nomuntu ohlukumezekile emphefumulweni asizakale, elapheke,” kusho yena.
Uthi njengoba esedlule ezintweni eziningi ezingezinhle - okuhlanganisa nemishado emibili engaphumelelanga - uzelapha ngokubhala phansi yonke imicabango yakhe noma ezwa kungavumi ukuba akhuleke imikhuleko yakhe uyibhala phansi.
Kwabesifazane abasebudlelwaneni obuhlukumezayo, uthi kubalukile ukuba baqonde ukuthi kabasoze bamshintsha umuntu wesilisa.
“Akekho umuntu ongamshintsha noma ngabe umthanda kangakanani. Okubalulekile wukuba uzithande wena kuqala ukuze kuthi uma umuntu ozwana naye ehluleka wukukuthanda, ungalimali kakhulu.
“Mina ngisindiswe wuthando lwezingane zami, okuyilo olungiphilisayo,” kusho yena.
Lo msakazi uphinde abe wubuso bezimpahla zangaphansi, iSatin Candy, athi ufundiswe ngunina esemncane ukuthi uma ungumuntu wesifazane kubalulekile ukumesha izimpahla zanga-phansi, ufake i- lipstick nezicathulo eziphakeme uzizwe uphatheke kahle.
Unabantwana abathathu, uTendaiTatenda (17), Thapelo- Mmomo (19) noZaiMia (3). “