Angalinge uMnu Ramaphosa akhankase ngezijumbana zokudla
MHLELI: Ngenxa yokuthi isizwe samaShona sikhulu eZimbabwe, uMnu Thabo Mbeki waphuma uphondo yedwa ngo-1987 ethi kuzonqoba iZimbabwe African National Union (Zanu) - hhayi iZimbabwe African People’s Union (Zapu) kaMnu Joshua Nkomo, okumanje iholwa nguMnu Dumiso Dabengwa emuva kokuba ivuswe ngo-2008 kwazise ngawo u-1987 yahlanganiswa neZanu kwabakhona iZanu - Patriotic Front.
AmaNdebele ayisizukulwane sikaMzilikazi kaKhumalo njengoba namaShangane eyisizukulwane samaZulu. I-Zanu ibibhekene nenselelo ebifana neye-African National Congress (ANC), umahluko kuwukuthi uMnu Robert Mugabe - obengumengameli weZanu - PF neZimbabwe - ubedonswa yinkosikazi yakhe ngekhala ngoba esemdala kanti la uMnu Jacob Zuma ubedonswa ngekhala ngamaGupta nabanye kubalwa noMengameli Vladimir Putin waseRussia.
Ngenxa yalokhu, isithunzi seZanu-PF nese-ANC saphela. Uma uNkk (Thobeka) Madiba-Zuma ethi “kuzoshipha ukotshi”, ngasho ngathi nango-ke uDisgrace Mugabe we-ANC. UMnu Mugabe noNxamalala banezithabathaba zemizi, bangomakhelwane eDubai. Bobabili baboshelwa ukuthi balwela inkululeko.
UMnu Mugabe ugogodile ngezemfundo, okaMsholozi akalitholanga ithuba masibonge uMnu Harry Gwala noMnu Eddie Daniels ngokumcathulisa. Thatha izindlu zalaba baholi uziqhathanise nezikaMnu Nelson Mandela, ipulazi likaMnu Mugabe liwudeda ngendlale. Okufanele-ke kugwenywe ngumengameli omusha, uMnu Cyril Ramaphosa eNingizimu Afrika, wukukhankasa ngezijumbane zokudla.
I-ANC ibingahambisani ne-Inkatha Freedom Party (IFP) uma isisebenzisa izijumbane zokudla okuyinto eqale kwaANC nguNxamalala. Ngeke ucebise umndeni wakho bese uthenga abantu ngokudla uyabathuka, okuyinto edina abavoti baseNkandla. Lokhu kuyisebenzelile iZanu.
Kuleli lizwe ngeke kumsize uMnu Ramaphosa. UMengameli waseZimbabwe, uMnu Emmerson Mnangagwa - obeyiwisa lokugadla likaMnu Mugabe - uthe uma engena emuva kokugudluzwa kukaMnu Mugabe ngokuphela konyaka odlule, wazama ukulungisa izinto azone nalo mholi.
NoMnu Ramaphosa uzama lokho. Bobabili uMnu Mugabe noMnu Zuma besaba ukulala bebaliwe, bavikela amafa abawathole ngokungemthetho, bayazi amanyala abo ayobekwa emlandweni ukuze izizukulwane zifunde ukuthi abalweli benkululeko bagcina bedicilela izithunzi phansi njengoMnu Eduardo dos Santos waseAngola.
UMsholozi akafuni ukuziqathakela, ufuna ukuwa ne-ANC njengoba esehamba noMnu Andile Mngxitama, abangcwabi nabefundisi abaziphathisa okukaBarabbas, uSawuli noGehazi.
Ukususwa kukaMnu Mugabe esikhundleni sokuhola iZanu-PF neZimbabwe, kulikhinyabezile iqembu elikhulu kwaphikisayo eZimbabwe, iMovement for Democratic Change (MDC) njengoba ne-Economic Freedom Fighters (EFF), iDemocratic Alliance (DA), Congress of the People (Cope) ne-United Democratic Movement (UDM) bezokhinyabezeka.
Phela uNxamalala ubengenisa amanzi endlini, yaphupha sibhekile i-ANC ngomuntu oyedwa! Washo uMnu Sipho Pityana wathi “zemuka izinkomo magwala ndini”.
Masimeseke uMnu Ramaphosa kodwa singacwayizi. Uma egenca kahle, siyothi: “Lo ungumfundisi kamama Albertina Sisulu, uMnu Oscar Mpetha noMnu Archie Gumede”, uma ephuma esipolweni, useyobuza ubab’ uZuma noMugabe.