Makakhethe umshushisi oqotho
ISINQUMO seNkantolo yoMthethosisekelo sokuthi uMnu Jacob Zuma oshiye kwesokuba ngumengameli waseNingizimu Afrika ngoNhlolanja (February) nonyaka, wasebenzisa budedengu amandla esikhundla sakhe ukuqoka umshushisi omkhulu ukufeza izinhloso zakhe siqu sakhe, siveza ngokusobala ukonakala kwezinto kuhulumeni kule minyaka elishumi edlule.
Umsebenzi omkhulu ohlalele uMengameli Cyril Ramaphosa manje wukulungisa okuningi okonakele ngokuba athathe izinqumo futhi abeke ezikhundleni zikahulumeni abantu abaqotho nabawaziyo umsebenzi abaqashelwe wona, angaqashi ngobungani nokwenzelela njengoba bekwenza umengameli obephethe ngaphambi kwakhe.
Inkantolo yomthethosisekelo kuleli sonto ithe uMnu Zuma wazama ngazo zonke izindlela ukuxosha owayengumshushisi omkhulu eminyakeni edlule, uMnu Mxolisi Nxasana, okwathi nxa enqaba ukushenxa, wamnunusela ngemali ebalelwa ku-R17 million, yabakhokhi bentela. Kwathi emuva kokuba uMnu Nxasana esesamukele lesi samba washiya isikhundla, uMengameli Zuma waqoka umshushisi othandwa nguyena, u-Adv Shaun Abrahams.
Noma inkantolo ingalibekanga ngembaba, kodwa abahlaziyi bezomthetho nabezepolitiki basola ukuthi uMsholozi wenza lezi zinguquko ngoba ezama ukuzivikela ukuba angashushiswa ngenxanxathela yamacala enkohlakalo uma esephelelwe yisikhathi sokuba ngumengameli.
Kusolwa ukuthi waqoka uMnu Abrahams kulesi sikhundla esibucayi ukuba abe ngumuntu wakhe, oyonyathela ubufakazi bamacala enkohlakalo ayenukwa ngawo, aze abole. Njengoba inkantolo isinqume ukuthi uMnu Zuma wasebenzisa amandla esikhundla sakhe ngokungekho emthethweni, sekukuMnu Ramaphosa ukuba abuyise ukuhlonishwa komthetho nehhovisi likamengameli ngokuphatha izindaba zombuso ngendlela, nokuhlonipha imithetho yezwe.
Kulesi sikhundla somshushisi omkhulu kufanele aqoke umuntu oqotho, ozimele, onomgogodla wokwenza umsebenzi ngaphandle kokwenzelela, onesipiliyoni salo msebenzi futhi ongachemile neqembu lepolitiki.
INingizimu Afrika idinga umshushisi ozosebenzela abantu, hhayi incelebane ezosebenza njengethuluzi lokufeza izinhloso zezikhulu ezithile neqembu eliphethe umbuso njengamanje.
Mkhulu kakhulu umonakalo owenzekile emazingeni kahulumeni, ngakho kubalulekile ukuba ulungiswe ngokuphuthuma ukuze iNingizimu Afrika izibeke ethubeni lokuba ngelinye ilanga ibe yizwe lapho umbuso usebenzela uquqaba, hhayi iqeqebana lezikhulu eziphethe, imindeni yazo, nobhululu bazo.
Sishayela ihlombe izinhlangano ezizimele ezifake isimangalo ngalolu daba ezinkantolo, ziphikisa isinqumo sikaMnu Zuma sokwephula umthetho ngokuxosha uMnu Nxasana ngaphandle kwesizathu esibambekayo. Ngaphandle komsebenzi oncomekayo walezi zinhlangano ezizimele, ngabe isimo sibi kakhulu ezweni. Sengathi lezi zinhlangano zingaqhubeka nalo msebenzi ukuqinisekisa ukuthi izikhulu ezilawula izwe zilandela imigudu efanele nxa zithatha izinqumo.