MAKUNGALAHLEKISELWA ABANTU NGESINKWA
MHLELI: Kunamahemuhemu asesabalele athinta izindaba ezingehli kahle emphakathini wonkana.
Imithombo ethembekile ezazi zonke ezikamengameli, ithi uhlela ukunciphisa izindleko ngokudiliza izisebenzi ezilinganiselwa ku-30 000.
Lokhu kusho ukuthi bonke abantu abasebenzayo bazogcina bethintekile erandini elintengayo kule minyaka - kusuka manje kuya phambili - okudalwa wukunyuka kwentengo ka-oyela nakho konke okuwumgogodla womnotho emhlabeni jikelele.
Sibi isimo kulabo abasebenza ezindaweni ezidayisa ukudla, izimpahla zokugqoka nokunye, nakhu-ke manje sekungenelwa ezisebenzini ebesingalindele ukuthi kuzogadla nakuzona.
Phambilini kusaphethe uMnu Thabo Mbeki engumengameli waseNingizimu Afrika, kuye le emuva kuMnu Nelson Mandela, kuneminyango ebihlangene ngaphambi kokuba owalandela (uMnu Jabob Zuma) ayihlukanise, okungabanga nomthelela omuhle.
Umnyango wezemfundo owawuphethwe nguMnu Kadar Asmal (ongasekho), wawuwodwa, ingekho le nto yokuthi kukhona oyisisekelo nosezingeni eliphezulu eqale ngaphansi kobengumengameli (uMnu Zuma). Kumele kuqale kuhlanganiswe le minyango
Khumbula ama- circular nama- curriculum aqhamuka noMnu u-Asmal, yini eqhamuke noBlade Nzimande no-Angie Motshekga ephusile?
Eminyangweni okumele ihlanganiswe, ngowezobuciko nowezemidlalo, owamaphoyisa nowezokuphepha, owe- zisebenzi nowezemisebenzi kahulumeni, owezamahlathi nowokubuyiswa komhlaba ezokudoba njalo njalo.
Uma kuwukuthi lokho kuwukuthela amanzi emhlane wedada, zikhona ezinye izindlela ezingenziwa ngaphambi kokuba kulahlekiselwe ngesinkwa obaba nomama bezinkumbi zezingane ezizosala dengwane zibulawa yinkemane.
Makusetshenziswane ukulwa nobubha nokusweleka kwemisebenzi, singabi yimbangela yokuphela kwayo kodwa sibe sisezikhundleni zokwenza impilo yabantu ibe ngcono njengoba sijutshwe yibona ukuphucula impilo yabo ngokwehlukana kwemikhakha yethu.