"Makusolwe uZuma ngodaba lweNPA"
Kuthiwa uMnu Nxasana kumele abuyisele kuhulumeni uR10m
UMENGAMELI Cyril Ramaphosa useqoke uDkt Silas Ramaite ukuba yibamba lenhloko yeNational Prosecuting Authority (NPA) emuva kwesinqumo seNkantolo yoMthethosisekelo ngoMsombuluko esithi ukuxoshwa kukaMnu Mxolisi Nxasana nokuqashwa kuka-Adv Shaun Abrahams kulesi sikhundla ngobengumengameli phambilini, uMnu Jacob Zuma, kube wukusebenzisa kabi amandla esikhundla sokuba ngumengameli futhi kuphambene nomthethosisekelo waleli lizwe.
UDkt Ramaite lona njengamanje uyiphini lenhloko yaleli hhovisi elengamele isigaba salo sokusingatha konke okuphathelene nokuvikelwa kofakazi benkantolo.
Usesebenze kulesi sikhundla iminyaka ewu-15, uzokuba yibamba izinyanga ezintathu uMengameli Ramaphosa esacubungula isinqumo senkantolo yomthethosisekelo.
Isinqumo siqhubeka sithi uMnu Nxasana kumele abuyisele kuhulumeni u-R10 000 000 awunikiwe ngesikhathi ephuma kulesi sikhundla.
UMnu Nxasana ongafuniseli ngomthetho namalungelo akhe futhi ozwakala ekhululekile ukuphendula imibuzo ngalolu daba, uthe makusolwe uMnu Zuma owenza konke okusemandleni ukumkhipha esikhundla sokuba yinhloko yehhovisi lokushushiswa komphakathi.
Phakathi kokunye abekusho enkantolo ngalolu daba wukuthi akukho akwenzile okuphambanayo nomkhombandlela ( guidelines) wokuqashwa nokuxoshwa komuntu okulesi sikhundla.
Uthi yikho lokho okwenze lwangenziwa uphenyo ngaye ngokulungela noma ukungasilungeli lesi sikhundla, futhi akukho okubambekayo okukhomba ukuthi ubumehlula umsebenzi.
Ukuba msulwa kwakhe uthe kufakazelwa yisona kanye lesi sinqumo senkantolo esithi ukukhishwa kwakhe kube wukusebenzisa budedengu amandla futhi kuphambene nomthethosisekelo.
“Njenganoma kubani onesivumelwano sokuqashwa, uma sekuthiwa makayeke ngaphambi kwesikhathi okuvunyelwene ngaso, kumele phela lowo muntu akhokhelwe ingxenye yesivumelwano ebisasele," kusho uMnu Nxasana.
Uthe empeleni wazabalaza engafuni ukushiya ngaphandle kokuba kube nophenyo futhi uMnu Zuma wenza kwaba nzima ukusebenza ngakho ngoba esezimisele ukumkhipha. Umi kwelithi imali ayinikeziwe uyithatha ngokuthi ingeyalokho okubizwa ngeconstructive dismissal ngokuhlinzeka komthetho ezimweni ezinjena, hhayi i- golden handshake okukhulunywa ngayo.
Ebuzwa ukuthi yini ezokwenzeka uma ethi akanayo imali okuthiwa makayikhokhe, uthe kulele kwabathathe isinqumo sokuba akhokhe ukuthi makwenzekeni.