Ubizelwe ebudokoteleni uDkt Masinga
UMSEBENZI wobudokotela ngomunye waleyo misebenzi edinga ukuba ube nalo ubizo lwawo kwazise kuningi ohlangabezana nakho okuhambisana nempilo yomuntu.
UDkt Portia Masinga onendawo yakhe yokusebenzela eSouth Beach, eThekwini ungomunye walabo abakusho kugcwale umlomo ukuthi ubizelwe kulo msebenzi wokwelapha abantu.
UDkt Masinga ongunkosikazi kaMfu Abraham Masinga, uthi ayikho into emthokozisayo njengokubuyisa ithemba lempilo kumuntu abemxilonga.
“Ukusiza abantu ngokwempilo yinto engenza ngiwuthande kakhulu lo msebenzi,” kusho uDkt Masinga, ozalelwe, wakhulela eMlazi.
Uthi waba nothando lwalo msebenzi esafunda esikoleni samabanga aphekeme eWestville Girls High, lapho ephothule khona umatikuletsheni. Uthi ngemuva kokuphasa kahle umatikuletsheni ubabele esikhungweni semfundo ephakeme eNyuvesi yaKwaZuluNatal lapho ethole khona iziqu zeBachelor of Surgery and Medicine. Ngemuva kokuphothula izifundo wenze - internship yakhe esibhedlela i-Addington wabe esedlulela kwesinye esiseMgungundlovu , iNorthdale ngaphambi kokuqashwa wuMnyango wezeMpilo KwaZuluNatal.
Uthi uqashwe ngaphansi komkhakha weForensic Pathology lapho ebehlonza khona izidumbu nembangela yokufa komuntu.
“Nakuba ngingazenzanga izifundo eziyisipesheli zalo mkhakha kodwa bengenza umsebenzi ofanayo kwazise mina bengiqashelwe ukuba yiMedi
cal Officer,” kusho lo dokotela okhonze ukumoyizela futhi okhuluma ngezwi elipholile, elikhombisa ukwamukela.
Uthi lo msebenzi wokuhlola izidumbu uwenze iminyaka eyisithupha ngaphambi kokuba avule indawo yakhe yokwelapha.
Uthi ubezimisela emsebenzini abewenza kwazise ubebuye aye nasenkantolo ayofakaza uma bekunolwazi oludingwa yinkantolo ngesidumbu esihlolwe nguyena.
Echaza ngomsebenzi wobudokotela uthi kumele ube nothando futhi ube nesibindi kwazise akuhlale kumnandi, kuningi ohlangabezana nakho okunye ongakulindele neze.
“Kubalulekile ukuba odokotela bangakhushukelwa yimimoya uma besebenza nabantu. Kumele bazimisele, kube yibona abanikeza ithemba esigulini nasemndenini walowo ogulayo.”
Eyala intsha ezimisele ukungena kulo mkhakha uDkt Masinga, uthi kumele iqale ukuzimisela isafunda esikoleni samabanga aphakeme futhi ikhethe izifundo ezihambisana nabo ubudokotela.
“Izifundo ezifana neMathematics, Physics neBiology zimqoka kakhulu kulabo abazimisele ukungena kulo mkhakha. Kakumele uze ube yisiqengqe esibadlula bonke abafundi kodwa kubalulekile ukuba uzimisele emsebenzini wakho wesikole,” esho.
Uthi ngaphandle kokusebenza endaweni yakhe ubuye asebenze nasesibhedlela i-Addington. Uqhuba athi ukuba nendawo yakhe kuyamkhulisa futhi sekumenze wafunda nokuqhuba ibhizinisi ngaphandle kobudokotela.
Ungumama mfundisi ngamaSonto kanti uyinkosikazi futhi ungumama wezingane ezintathu. Uthi konke lokhu kubalulekile kuyena, ngakho uyaqinisekisa ukuthi usihlela kahle isikhathi sakhe.
Uthi uma esenkonzweni ungumama mfundisi, uma esekhaya ungumakoti futhi umama wezingane, bese kuthi emsebenzini ungudokotela.
Izifundo ezifana neMathematics, Physics neBiology zimqoka kakhulu kulabo abazimisele ukungena kulo mkhakha. Kakumele uze ube yisiqengqe esibadlula bonke abafundi kodwa kubalulekile ukuba uzimisele...