UZOGIJIMA NABESILISA NABESIFAZANE U-CASTER
UZOGIJIMA eqenjini elixube abesilisa nabesifazane uCaster Semenya kwi-International Association of Athletics Federaion (IAAF) Continental Cup ezoqala mhla ka-8 isongwe mhla ka-9 kuMandulo (September) e-Ostrava.
Kule midlalo iNingizimu Afrika izokube imelwe ngabasubathi abangu-20 kwabangu-74 base-Afrika. Kulo mqhudelwano uCaster uzokube enza ibanga lika-400m, 4x400m exube ubulili ne-800m. Abasubathi abamele i-Afrika baqokwe ngemuva kokwenza kahle kwiCAA Track and Field Championships ebisekuqaleni kwenyanga eNigeria.
UCaster ngomunye wabasubathi abenze kahle eNigeria ngemuva kokuba ephule irekhodi lakuleli le400m kanti usanda kwenza ngcono irekhodi lakhe le-800m kwi-IAAF Diamond League.
Abanye abasubathi abamele elakuleli ngu-Akani Simbine kwi100m, uRuswahl Samaai omangaze abaningi ebuya nendondo eNigeria eshiya imfivilithi uLuvo Manyonga ongene isibili.
UMengameli we-Athletics South Africa (ASA) u-Aleck Skhosana uthe uyababongela bonke abasubathi abaqokelwe kulo mqhudelwano, wathi unethemba lokuthi bazokwenza kahle.
Sebebonke abasubathi baseNingizimu Afrika abamele i-Afrika badidiyelwe kanje: uCaster Semenya, uRikennette Steenkamp, uZinzi Chabangu, u-Ischke Senekal, uJo-Ane van Dyk, u-Akani Simbine, uTiti Ncincilili, uPhora Thapelo, u-Antonio Alkana, uCornel Fredericks, uSimon Makagwe, uHenricho Bruintjies, u-Emile Erasmus, uRuswahl Samaai, uKhosto Mokoena, uChristopher Moleya, uHendrick van Wyk, uVictor Hogan, uTshapaung Makhethe noPhil-Mar Janse van Rensburg.