AZOBANJWA AMAQILI KWEYE-COCA COLA
AZOBANJWA kalula amaqili emidlalweni yokukhipha umakhonya waKwaZulu-Natal kwiCopa Coca Cola U/15 Cup ezogijinywa ngoMgqibelo eKing Zwelithini Stadium, eMlazi.
USmanga Mgenge onguNobhala weSouth African Schools Football Association (Sasfa), uthe akukho noyedwa umdlali ongadlalanga emidlalweni yezifunda ozobamba iqhaza ngoMgqibelo.
Uthe bazophinde baqinisekise ukuthi akukho mdlali okokotele iminyaka yobudala ngoMgqibelo ekuseni ngaphambi kokuqala kwemidlalo.
“Sinalo lonke uhlu lwabadlali abadlala kulo mqhudelwano. Akekho ozoqhamuka esithubeni ozovunyelwa ukudlala. Bazojeziswa kanzima othisha abazozama ukukokotela iminyaka yabadlali ngoba lokhu kungcola kusiqhatha nabaxhasi bethu. Silindele izinga eliphezulu kulo mqhudelwano. Sinethemba lokuthi isikole esizokudla ubhedu, sizokwazi ukumela kahle isifundazwe ezingeni likazwelonke,” kusho uMgenge oyiMeya yaseMfolozi.
Le midlalo izohanjelwa nguJabu Mahlangu wodumo kwiKazier Chiefs ozoqoka abadlali abazokhanda isikwati esizohlelelwa imidlalo emqoka ngenhloso yokubanikeza ithuba lokuzibonakalisa emakilabhini amakhulu. Imidlalo kazwelonke izoqala mhla ka-26 isongwe mhla ka-29 eWolfson Stadium, eBhayi.
Le midlalo isikhiqize abadlali okubalwa kubona uHappy Jele ongukaputeni we-Orlando Pirates, uPercy Tau osezogijima eBelgium, u-Andile Jali, uKhulekani Kubheka noNotha Ngcobo beMamelodi Sundowns ukukha nje phezulu.
Selulonke uhlu lwezikole ezizobanga ukuba yizingqwele zesifundazwe lumi kanje: KwaMyayiza High School, Buhlebomzinyathi High School, Bongumenzi High School, New Guiderland Secondary, Nyika Secondary School, KwaGiba High School, Glenwood High School, Old Mill High School, Edendale Technical High School, JG Zuma High School, Tholithemba High School neZashuke High School.