UYOCIJA AMABHOKISA OPHONGOLO UBABY-FACE
UZOCIJA intsha yasoPhongolo ngolwazi olujulile lwesibhakela uMoruti “Babyface” Mthalane oyingqwele ye-International Boxing Federation (IBF) Flyweight.
UMthalane uzokuba sethimbeni elizohambela imidlalo yeMayoral Cup yasoPhongolo ezoqala ngoMgqibelo isongwe ngeSonto eMshinini Sports Field nasoPhongolo Academy.
UMthalane unqobe ibhande leIBF kunzima ehlula uMohammed Waseem wasePakistan ngenyanga edlule eMalaysia. Ngeledlule ubeyokhombisa unina leli bhande eMpendle. UMthalane bese elinqoba ihlandla lesibili leli bhande njengoba eke waliphatha phambilini, kodwa walishiya ngemuva kokuthenjiswa imali encane ukuze alivikele.
UMthalane uzoqoka amabhokisa azokhanda isikwati esizokuya komela iZululand kumaSalga Game azokuba seMgungundlovu ngasekupheleni konyaka. Uzokube ehambisana noDoctor Khumalo, uHelman Mkhalele noWiliam Shongwe bona abazoqoka isikwati sikanobhutshuzwayo esizodlala kumaSalga Game bese sihlelelwa imidlalo nezikwati zeMultiChoice Diski Challenge (MDC) zamakilabhu agijima kwi-Absa Premiership. UWinile Nhlabathi oyiMeya yasoPhongolo, uthe unethemba lokuthi intsha yakule ndawo izoncela ulwazi ulujulile kulezi zinkakha.
“Sizokuba nemidlalo eminingi eyahlukene. Kuzoqhudelwana kunobhutshuzwayo wabesilisa nabesifazane, ezokugijima, umbhoxo, ikhilikithi, isibhakela nebhola lomnqakiswano. Konke sekusezandleni zentsha yakule ndawo ukuzibonakalisa,” kusho uNhlabathi.
UMluleki Ndobe onguSihlalo weSalga esifundazweni, uthe balindele ukuthi imidlalo yeSalga ibe sezingeni eliphezulu nonyaka.
ISalga izokuba nomhlangano wokucobelelana ngolwazi ozoqala namuhla ngoLwesine usongwe kusasa ngoLwesihlanu ePort Edward. Lo mhlangano uzohanjelwa yiziMeya, osomlomo izimenenja zomasipala nabaphathi bezimali.
Uzovulwa nguWillies Mchunu onguNdunankulu wesifundazwe noNomusa Dube Ncube onguNgqongqoshe WezokuBusa ngokuBambisana neziNdaba zoMdabu esifundazweni.