UMQEQESHI WAMABHOKOBHOKO WESABA INSELELO YE-ARGENTINA

UMQEQESHI weqembu lesizwe lakuleli le-rugby amaBhokobhoko uRassie Erasmus ubona inselelo enzima eqenjini lesizwe laseArgentina.

AmaBhokobhoko azovovana inkani ne-Argentina kowe-Castle Lager Rugby Championship ngoMgqibelo ngo-17h05 eJohnsson Kings Park Stadium, eThekwini.

U-Erasmus uthe: “Sizobhekana neqembu elishintshe kakhulu neliqinile. Kunabadlali bami abadlale imidlalo eminingi yeSuper Rugby okuzofanele sibanakekele.

I-Argentina inomqeqeshi omusha uMario Ladesma.

Uma ungabheka umfutho okhonjiswe iJaguares kwiSuper Rugby yase-Argentina kulonyaka ungangifakazela kulokhu engi- kushoyo badlala kahle kakhulu,” kusho u-Erasmus. Nokho ukhuluma kanjena nje lomqeqeshi uyazi ukuthi bazobhekana nomqansa kuleli qembu lase-Argentina elithakwe ngabadlali abaningi abagijimela iJaguares ekwaze ukushaya wonke amakilabhu akuleli abedlala kowe-Super-Rugby nonyaka. Iqembu lamaBho-kobhoko elizobhekana ne-Argentina lizomenyezelwa namuhla ngoLwesine.

Umdlalo olandelayo wamaBhokobhoko azowugijima ne-Argentina ekuhambeni.

Khonamanjalo, iCell C Sharks izogijima umdlalo wokugcina wokuzifudumezela ukuqala kweCurrie Cup njengoba izobhekana neBordeaux Begles kusasa ngoLwesihlanu ngo-19h00 eMoses Mabhida Stadium, eThekwini.

Umqeqeshi weSharks, uRobert du Preez Snr ekhuluma naleli phephandaba izolo ngoLwesithathu ese-Artizen Lounge, KwaMashu lapho bebemenywe khona ngumnyango wezokuvakasha ngaphansi kukaMasipala weTheku uthe uzonika abadlali abasebancane ithuba.

“Kuyinto enhle ukuthi abadlali abaningi abanesipiliyoni abekho ngakho-ke kulo mdlalo ngizonika abadlali abasebancane ithuba,” kusho uDu Preez.

UChiliboy Ralepelle oqokwe ukuba ngukaputeni weSharks kule midlalo yeCurrie Cup uthe uyakujabulela ukuba ngukaputeni weqembu elihlonishwayo njengeSharks.

ISharks izovula le midlalo yeCurrie Cup ngoMgqibelo mhlaka-25 kwephezulu ngo-15h00 eJohsson Kings Park Stadium, eThekwini.