OweMaritzburg "uteleke" isinyenyela
Isikhulu sesijike umqondo ngokudayisa uNdlovu
SESIJIKE umqondo isikhulu sekilabhu yaKwaZulu Natal ngomdlali ebesinqaba ukumdedela efunwa ngamakilabhu amakhulu sikhala ngokuthi usemncane.
USiphesihle “Mbesuma” Ndlovu (21) odlala esiswini kwiMaritzburg United uke waba sematheni kuvela ukuthi ufunwa yizinkunzi zaseGauteng.
Phakathi kwamakilabhu abemfuna kungabalwa iMamelodi Sundowns, Kaizer Chiefs neOrlando Pirates.
UFarook “Ntshebe” Kadodia ongumnikazi weMaritzburg walile ukudedela uNdlovu ezeseka ngokuthi usemncane ufuna okungenani ahlale enye isizini kuyima emdedela.
Nokho lo mdlali ayizange imphathe kahle indaba yokuthi iLebohang Maboe adedelwe ajoyine iSundowns kodwa yena angavunyelwa ukuhamba.
Kuthiwa unqume ukuhudula izinyawo yingakho eshaya into ephansi emidlalweni yeMaritzburg.
Leli phephandaba lithole ukuthi isiteleka esingumshosha phansi salo mdlali, sizwelile njengoba uKadodia kuthiwa useshintshe umqondo uyamdayisa. Kuthiwa usewazisile amakilabhu amfunayo ukuthi uyamdayisa.
Nokho kuthiwa yiSundowns esahamba phambili.
Leli phephandaba lishayela uKadodia ngalolu daba uthe: “Engingakusho wukuthi ngeke ngikwazi ukugcina umdlali ngibe ngibona ukuthi akasekho lana ngokomqondo.
"Njengamanje sizimisele ukumdedela ngaphambi kokuba kuvalwe iwindi kodwa uma sithola imali ezosigculisa.
"Angeke ngikwazi ukusho ukuthi ngobani abahamba phambili kodwa bakhona abamfunayo.
"Asithule sibheke ukuthi kuzokwenzekani ngaphambi kokuba kuvalwe iwindi kodwa yena sengishintshe umqondo ngaye, ngizomdedela uma imali iyinhle,” kusho uKadodia.