I-DOWNS NE-PMB UTD EMBANGWENI WEHOLO LOMDLALI
IBHEKENE ngeziqu zamehlo iMaritzburg United neMamelodi Sundowns njengoba kuvela ukuthi kunomdonsiswano ngeholo lo mdlali obolekwa yile kilabhu yaseMgungundlovu.
IMaritzburg izobhekana neKai- zer Chiefs kowe-Absa Premiership kusasa ngoLwesihlanu ngo-20h00 eHarry Gwala Stadium, eMgungundlovu.
IMaritzburg iya kulo mdlalo nje, izinto aziyihambeli kahle njengoba ingakanqobi mdlalo selokhu kuqale isizini.
Umqeqeshi wayo uFadlu Davids uphumele obala wathi inkinga abanayo wukuthi abanaye umgadli ovalela amathuba abawatholayo.
Ngeledlule uYannick Zakri ongumgadli weSundowns utheleke eMgungundlovu ngenhloso yokuzoyitakula kwazise ifuna ukumboleka isizini yonke.
Lo mdlali uyajima nale kilabhu yaseMgungundlovu futhi ubukeka ebukhali.
Nokho leli phephandaba lithole ukuthi kubheda uhlelo njengoba iDowns neMaritzburg bengavumelani ngemali okufanele iholwe yilo mdlali.
Kuvela ukuthi iDowns ifuna iMaritzburg ikhokhe imali engaphelu kakhulu kwale ebiyithembise lo mdlali.
Leli phephandaba lishayela uFarook “Ntshebe” Kadodia ongumnikazi weMaritzburg ngalolu daba uthe indaba kaZakri isafana nento efile okwamanje.
“Okwamanje ayikho indlela eya phambili ngodaba lukaZakri asivumelani neSundowns ngezimali.
Empeleni bafuna sikhiphe imali engaphezulu kwale obekufanele bayikhiphe okuyinto engingahambisani nayo.
Uma kungukuthi asivumelani ayikho into engizoyenza kuzofanele aphindele kuyona.
Kodwa-ke nginethemba lokuthi izinto zizogcina zilungile ngoba siyamdinga umgadli,” kusho uKadodia. Imizamo yokuthola uTrott Moloto osebenza ehhovisi likaMengameli weSundowns uPatrice Motsepe ukuzwa uhlangothi lwale kilabhu iphunzile njengoba ucingo lwakhe ubengalubambi. UThulani “TT” Thuswa wezokuxhumana kwiDowns uthi ngokwazi kwakhe uZakri bamubolekise kwiMaritzburg.