ULAXAZE UMSEBENZI WAQOMA UKUSIZA ABADLA IMBUYA NGOTHI
UGQOZI nelukuluku lokusiza abantu abaswele, kwenze owesifazane waKwaNyuswa walaxaza umsebenzi obubeka isinkwa etafuleni emndenini wakhe, walandela ubizo lokusiza abanye.
UNkk Lydia Hlophe ubalwa nabesifazane abenze umehluko emiphakathini yabo njengoba eqoqe abesifazane abangabafelokazi abangasebenzi - abangakafiki esigabeni sempesheni - wabafundisa ukuzisebenza ukuze balale bedlile nemindeni yabo.
Ekhuluma neLANGA uNkk Hlophe, obesebenza ekhishini emajalidini aseHillcrest, okumanje usengumnikazi weYenzanathi Organisation ayisungule ngo-2010, uthi esasebenza, bekunomndeni wowesifazane osekhulile obekuthi njalo uma ebuya emsebenzini kudingeke ukuba awuhlephulele kulokhu anakho ukuze nawo ulale udlile.
“Ngithe ngisakwenza lokho, ngabona ukuthi miningi imindeni enale nkinga ngase ngiyeka emsebenzini ngoba ngizizwa nginecala enhliziyweni yami ngokungabasizi. Ngikhulume nekhansela nganikwa indawo ngahamba ngicela uxhaso lwekhonteyina ngaluthola kwaCheckers, ngaqala ngenza i- soup kitchen.
"Ngiqale nginabesifazane abawu-10 kodwa manje ikhishi lethu seliba nabantu abawu-200 ngosuku. Uma befika ngibenzela isobho, siyapheka nasemini badle. Nokho bekungenele njengoba bebehamba nezitsha njalo nta- mbama bathi baphathele izingane.
"Sibe sesiqala satshala nabo ingadi ngosizo loxhaso lwezitshalo esiluthole kwabakwa-Food for Trees. Sitshala i- spinach, amaklabishi no-anyanisi, sifuye izinkukhu zamaqanda sidayise ukuxosha ikati eziko,” kusho uNkk Hlophe.
Uthi yize isimo salaba besifazane sishintshile, sebelala bedlile, kodwa zikhona izinselelo abasabhekene nazo.
"Inkinga enkulu esibhekene nayo njengamanje ngeyokuthola abaxhasi abazohlala nathi isikhashana ukuze bonke laba besifazane bagcine sebekwazi ukuzimela. Inkinga enkulu wukuthi lokhu kudla esikutshalayo kuthatha isikhashana ukuvuthwa okuba yinkinga ukuthi bazodlani ngesikhathi besalindile,” kusho yena.
Uthi eqala bekuwukusiza omama nje, kodwa manje sekungene nentsha njengoba besanda kuthola uxhaso lwamakhompyutha asesiza intsha yakuyona le ndawo uma ifuna ukwenza ama-CV nokunye. Uthi baphinde basize nabafanyana ukubagcina bematasa ngokubafundisa ibhola.
“Ibhola lehlukene izigatshana njengoba kukhona u- under- 12,15 no-19. Baqeqeshwa ngabafana bakhona la endaweni abahambe bayothola uqeqesho.
"Laba bafana kabagcini ngokubaqeqesha ebholeni, baphinde babasize nangomsebenzi wesikole uma kukhona lapho benenkinga khona. Kuyabasiza kakhulu lokhu njengoba kubaphephisa ezidakamizweni nasekubeni wuvanzi behla benyuka emigwaqweni beganga,” kusho uNkk Hlophe.
Omunye wabesifazane abasizakalayo eYenzanathi, uNkk Khonzeni Xaba, uthi impilo isishintshe kakhulu selokhu beqale ukuzihlanganisa nale nhlangano.
“Singomama basemakhaya abangasenabani, besike silale singadlile, okuncane okukhona sikunika izingane.
"Uma sekufanele kuphakwe kwami, bengivele ngiyolala ngoba bengazi ukuthi okukhona ngeke kusenele sonke. "Selokhu siqale ukutshala la eYenzanathi, kasisalali singadlile. Uma singase sithole uxhaso ngikholwa wukuthi singakwazi ukuyandisa nale ngadi esiyilimayo ukuze okunye ukudla kudayiswe ezimakethe.
"Sifisa nokuxhaswa ngemoto ngoba uma kukhona abasinika izinkwa nezimpuphu, kumele sishaye amaphakethe ethu ukuze sikwazi ukuqasha imoto ezokulanda,” kusho yena.