Uhulumeni kumele ushintshe ukwenza
NGOLWESIBILI umnyango kahulumeni owengamele, phakathi kokunye, ukucwaninga nokushicilela izibalo ngesimo somnotho nokusweleka kwemisebenzi, iStatistics South Africa (Stats SA), udalule ukuthi kulezi zinyanga eziyisithupha ezedlule amandla omnotho wezwe ehle kakhulu, okuyisimo esibizwa phecelezi nge- technical recession.
Empeleni okudalulwe yiStats SA, yinto abantu bakuleli abebevele beyizwa ephaketheni kusukela eminyakeni elishumi edlule. Kuzokhumbuleka ukuthi umnotho womhlaba wonke ushone phansi ngo-2008, okuholele ekuweni kwezinkampani, kwadilizwa izigidigidi zezisebenzi emazweni ahlukene kubalwa nakuleli lakithi.
Amazwe amaningi, ikakhulukazi i-United States of America (USA), wona akwazile ukuqhamuka namasu ukulungisa lesi simo. E-USA nje, isibalo sabantu abangasebenzi sesehle kakhulu njengoba sibalelwa kumaphesenti amathathu kanti umnotho wakhona ukhula ngesivinini.
Uma siqhathanisa, iNingizimu Afrika yona inenkinga yomnotho osesimeni esibi nokusweleka kwemisebenzi njengoba ngokwezibalo zeStats SA babalelwa ku-27% esibalweni sabantu bakuleli abangawutholi umsebenzi, kanti lesi simo siyaqhubeka ngokuba sibi njengoba ivezile iStats SA ngoLwesibili. Inkinga wukuthi kuthe uma umnotho wamanye amazwe usimama, owethu waqhubeka nokuxhugela ngenxa yokuthi akukho okutheni esikwenzile njengezwe ukulungisa isimo.
Kule minyaka elishumi edlule, amaholo ezisebenzi abengakhuli nhlobo, kokunye ekhula nje okungatheni esikhathini lapho intengo yokudla, impahla, uphethiloli nezinye izidingo ezimqoka zempilo bekuqhubeka nokubiza kakhulu. Ngamafuphi, besiphila kangconywana ngaphambi kuka-2008 uma uqhathanisa nanamuhla.
Uhulumeni nabantu bakuleli, bakhonze ukukhuluma kakhulu ngamasu nezinhlelo abaphezu kwazo ukulungisa okonakele, kodwa uma sekufanele lezo zinhlelo zenzeke, akwenzeki lutho. Okufanele sikufunde singabantu bakuleli wukuthi uhulumeni kawukhiqizi lutho, kodwa usebenzisa imali yabakhokhi bentela, okuyizinkampani nezisebenzi, ukwenza imisebenzi yomphakathi.
Lokhu kusho ukuthi kufanele osopolitiki baqonde ukuthi umnotho usebenza kanjani, nokuthi yini okudingeka yenzeke ukuheha abatshalimali ukuze kudaleke amathuba emisebenzi. Singaphuma kanjani kulolu taku lweminyaka esikulo? Ngisho osopolitiki bangakhuluma baze bakhihlize amagwebu, ngeke bakwazi ukuxazulula izinkinga zomnotho nobuphofu esibhekene nakho bebodwa.
Kuzodingeka ukuba kubanjiswane phakathi kukahulumeni, izisebenzi nabamabhizinisi ukuze kuqhanyukwe namasu anzulu okukhulisa umnotho, kudaleke imisebenzi. Imithetho kahulumeni eyenza kube nzima ukuqala izinkampani nokukhulisa ezikhona, kufanele ibuyekezwe. Izinkulumo ezingakhi mayelana nokudliwa komhlaba ngaphandle kwesinxephezelo ngeke zisisize ukulungisa okonakele. IZimbabwe iyisibonelo salokhu.
Kufanele futhi kubuyekezwe amaholo aphezulu ezikhulu zikahulumeni, kuncishiswe nesibalo songqongqoshe, bese kusetshenziswa imali eyongeka kulokhu ukulungisa izakhiwo zomphakathi nokudala amathuba oquqaba.