UVEZA OKUMYEKISE UKUBASELA I-BUCS
UVEZA isizathu esemenze wayeka icala abelifakele i-Orlando Pira-tes efuna imali yakhe umdlali oke wa-gijima kuyona le kilabhu eholwa ngu-Irvin “Iron Duke” Khoza.
UClifford “Dona” Ngobeni ongukaputeni we-University of Pretoria egijima kwiNational First Division (NFD) uke wabhekana ngeziqu zamehlo nePirates eyisola ngokuthi imkweleta izimali zakhe zokusayina.
Uyifakele icala elidonse isikhathi eside kodwa kwagcina kungacacanga ukuthi kwenzakalani.
Lo mdlali ekhuluma naleli phephandaba emuva komdlalo wezakhe neReal Kings ngeledlule eSugar Ray Xulu Stadium, eClermont ulizevele ukuthi yini emphoqe ukuthi aliyeke icala.
“IPirates ibingikweleta imali eningi kodwa nginqume ukuvele ngiliyeke icala sengihambile nalo.
Kuningi okwenzekile ngesikhathi ngihamba leli cala ngaze ngabona ukuthi ngiphelelwa amandla ngilwa impi engingeke ngiyinqobe.
Kunabantu ongeke ulwe nabo abanamandla ngendlela eyisimanga nami ngiphoqwe yileso simo ngavele ngashiya phansi.
Angiyibambele gqubu iPirates sengakwamukela okwenzeka okumqoka kimina njengamanje wukuthi ngisize iTuks ibuyele kwi-Absa Premiership.
Yilona thuba leli engizolisebenzisa ukufeza iphupho lami lokubuyela kwiPremiership,” kusho uNgobeni.
Emuva kokuba lo mdlali ededelwe yiMpumalanga Black Aces ngo-2013 kusabalale imibiko ethi udonsa kanzima ngasezimalini.
Kuvele ukuthi udlelwe imoto yohlobo oluphambili waphinde wadlelwa nendlu okuphoqe ukuthi abuyele kubo eSoweto.
“Angifuni ukuqamba amanga ngike ngashayeka kanzima empilweni kodwa angisiboni isidingo sokuthi ngibuyele emuva entweni esengadlula kuyona.
Impilo iyaqhubeka okwenzeka ngeke ngisakushintsha,” kusho uNgobeni.