ISilo siphawule ngokuqaqamba kwenhliziyo mhla kushona izintombi
ISABHIBHA inhliziyo yeSilo samaZulu, uZwelithini kaBhekuzulu, ngengozi yebhasi eyenzeke emgwaqweni u-R66 phakathi kweShowe neMelmoth, yadlula nemiphefumulo yezintombi ebeziphuma eMkhosini woMhla-nga ngo-2013.
Kule ngozi - yebhasi lalithwele izintombi ezaziphuma ngaphansi kukaMasipala waseMzu-mbe - kwashona abantu abawu-10. Enkulumeni yaso eMkhosini woMhlanga obusesigodlweni saso eNyokeni, KwaNongoma kusukela ngoLwesihlanu kuze kube yizolo, iSilo sinxuse uNgqongqoshe wezobuCiko namaSiko KwaZulu-Natal, uNkk Bongi Sithole-Moloi ukuba kuhlonishwe izintombi nomama abalimala kule ngozi. Kube sekuthathwa umzuzu wokubakhumbula.
“Le ngozi yawuphazamisa kakhulu umoya wami ngoba (izintombi) zahamba emhlabeni ngendlela ebuhlungu futhi zisencane. Ezinye zazo mhlawumbe ngabe sezinenhlanhla yokuthola umendo. Ngakhipha wonke umndeni wami ukuba uhambe uyongizwela, ungixolisele umele isihlalo sobukhosi.
"Ngakhipha nondlunkulu ukuze beyohlangana nemindeni, yize bengavumelekile ukuya emingcwabeni. Namanje kangikawutholi umbiko wokuthi kwenzekani (kule ngozi).
"Izimo ezifana nalezi uma zenzekile, kusungulwa amakhomishini - nami engiwesekayo - njengaseSidimeni nje, kodwa kungani uma kwenzeke lokhu okuthinta ubukhosi kuthuleke?
"Ngifisa MaSithole ungidlulisele lokhu ngoba kufana neva kimi,” kusho iSilo.
Sikhwele sadilika kwabezindaba nabazibiza ngongoti, sathi kabakhulumi ngezindaba ezakha izwe, kepha bajabulisa abanikazi bezinkampani ezithumela izindaba kubantu ezweni naphesheya.
“Kalikho izwe elingenazo izindaba zalo ezimbi, kodwa ngibona kusetshenziswa abantu bakithi abamnyama ukubhala kabi ngabo nangezwe labo. Abezindaba basahlalelwe wumsebenzi omkhulu wokuphenya ukuthi kwenzekeni ngemali eyahlinzekwa wuhulumeni ukuba kwakhiwe inkundla eseNyokeni eyasala iyizindonga.
"Kungiphethe kabi kakhulu lokhu ngoba ngikufanisa neva elihlabayo enhliziyweni yami. Kufanele sikulindele ukuthukwa emuva kwalo mkhosi, siyaye sibaphathe kahle noma besithuka, kasibatalabhi.
"Ngathi kodwa sesizofika isikhathi sokuba sizivikele manje. Siyanithanda uma nisaziphethe kahle bantu bezindaba, musani ukusiqala,” kusho iSilo.
UMntwana uMbonisi - ongomunye wabakhulumela iSilo - ubonge bonke abaqinisekise ukuthi lo Mkhosi Womhlanga ube yimpumelelo, ikakhulukazi umnikazi wenkampani yamanzi, i-Aquelle ngokuhlinzeka izintombi ngamanzi okuphuza, nayo yonke iminyango kahulumeni.
Thina sihlale sibaphatha kahle kodwa noma besithuka, kasibatalabhi Sesizofika isikhathi sokuba siziikele. Nabezindaba siyabathanda basaziphethe kahle.