Bathuleleni abaholi kumosheka izinto?
KUBUKEKA sengathi iqembu eliphethe izintambo zombuso, i-ANC, kalizimisele ukukhalima izinhlangano elidlelana nazo, eziphazamisa imihlangano nezinhlelo zentuthuko zikahulumeni, zifune ngenkani ukuhlomula ngaphandle kokulandela imibandela nemigudu esemthethweni.
Kokunye mhlawumbe abaholi baleli qembu bangamavaka angakwazi ukumela iqiniso, akhuze uma abantu benhlanhlatha, bephula imithetho yezwe udede. Sikhuluma lapha ngezinhlangano ezifana nabazibiza ngamaDelangokubona, amalungu ophiko lwezempi lwe-ANC, Umkhonto weSizwe, nenhlangano ezibiza ngokuthi yiFederation for Radical Economic Transformation (FRET).
Sekuyinto ejwayelekile ukuba amalungu alezi zinhlangano KwaZulu-Natal, angene ngo’dli’ emahhovisi eminyango kahulumeni wesifundazwe noma omasipala abangaphansi kukaKhongolose, afune ngendlakadla ukuqashwa ezikhundleni nokunikwa amathenda. Kokunye amisa ngisho imisebenzi yomphakathi njengokwakhiwa kwemigwaqo, izikole, namabhizinisi.
Laba balisa kabayingeni eyokulandela imigudu efanele ukuthola lokho abakufunayo.
Ngeledlule, abantu okuthiwa bangamalungu oMkhonto weSizwe baphazamise ukusebenza kumasipala iMooi-Mpofana ngoba befuna ukunikwa izikhundla ngenkani. Okushaqisayo wukuthi omunye wabo kuthiwa wake waba yimeya yawo lo masipala.
Kwesinye isigameko, abazibiza ngamalungu eFRET, bangene ngenkani emhlanganweni womnyango wezempilo esifundazweni, eMgungundlovu, bathumba izikhulu ukuze baziphoqe ukuba zibabele amathenda, ngaphandle kokulandela imithetho yezwe.
Izehlo ezifana nalezi sezike zenzeka nakwabanye omasipala, kuhlanganisa nowaseThekwini, kwaze kwaba abephuli mthetho banikwa lokho ababekufuna.
Ngenxa yokuthi laba bantu bayesatshwa futhi abakufunayo bayakuthola, kubukeka sengathi lokhu sekubanike isibindi sokuqhubeka bazenzele umathanda.
Okufanele kukhunjulwe kulolu daba wukuthi imali enikwa laba bantu, ngeyabakhokhi bentela, kakuyona eyeqembu lezepolitiki.
Kuyiqiniso ukuthi ezinye zezikhulu eqenjini le-ANC sezike zaphefumula, zibugxeka lobu bugebengu. Kodwa ukuphefumula kwazo kakwanele ngoba lezi zenzo zobugebengu ziyaqhubeka.
Abantu abenza lobu bugebengu kufanele ngabe bathathelwa izinyathelo zokuqondiswa ubugwegwe yiqembu labo, kuthi ubulungu babo bubuyekezwe kabusha ngenhloso yokuthi uma betholwa benecala, baxoshwe eqenjini.
Ngaphezu kwalokho, kufanele baboshwe, bashushiswe ngobulelesi ababenzayo, kungathalaliswa nje, iNingizimu Afrika iphenduka izwe elingenamthetho sibhekile.
Bathule bathini ongqongqoshe kuhulumeni kazwelonke, sibala lapha owamaphoyisa, uMnu Bheki Cele, nowomasipala, uDkt Zweli Mkhize, uma imithetho yezwe yephulwa ngale ndlela, bethi baphethe izwe?