UMASHABA UNCOMA IGALELO LABE-NEDBANK
Ebika eseMakhulong Stadium, eTembisa
LIQHUBEKILE ishobolo lokunganqobi kweNedbank Ke Yona Team emdlalweni nezingqwele zeNedbank Cup ihlulwa yiFree State Stars ngo-21 izolo ngeSonto ntambama eMakhulong Stadium, eTembisa, eGauteng.
Le nkundla iyikhaya leHighlands Park esanda kukhuza ibuya kwi-Absa Premiership.
Amagoli eStars avalelwe nguJusuf Jappie no-Eleazer Rodgers, kwathi eleKe Yona lashaywa nguLunathi Mdatyulwa ngesiwombe sokuqala okuholele ekutheni kuyiwe ekhefini kungu-1-1.
IStars ibidlala lo mdlalo njengezingqwele zeNedbank Cup kwazise ihlule iMaritzburg United ngo-1-0 wegoli likaGoodman “Deco” Dlamini kowamanqamu eCape Town Stadium.
IKe Yona team eholwa nguEphraim Mashaba, ibingayinike thuba iFree State kulo mdlalo njengoba ibihlasela kungabonakali uku- thi iqhathwe nekilabhu egijima esigabeni esiphakeme. UMdatyulwa ubengayazi nokuthi iyini iFree State esiswini njengoba ubedlala ingcwenga yebhola ebisukumisa izinkumbi zabantu ebezihambele lo mdlalo.
Abadlali beKe Yona akukacaci ukuthi bazokuya koziqeqesha namaphi amakilabhu ePremiership njengoba bezovotelwa ngabalandeli nonyaka.
UThabo Mogotsi ongunozinti weKe Yona ugile izimanga ngesiwombe sokuqala evimba amabhola anzima abethunyelwa yiFree State ikakhulu abevela kuJudas Moseamedi ongumgadli. UMoseamedi uke walivalela igoli enethini kodwa uCedrick Mivhali obephethe umdlalo wathi udlalise kabi umdlali weKe Yona. UMashaba ubancomile abadlali bakhe ngokuba nesibindi kulo mdlalo.
Ube esencoma igalelo leNedbank ngalo mkhankaso wathi uzolikhulisa ibhola lakuleli.
Uthi liningi ikhono elifihlekile elivezwa yilo mqhudelwano.