ISILO SIHLABA ABAKHIQIZA AMABHAYI ANOBUSO BASO
UKHANKASELWE amavoti yiSilo samaZulu, uZwelithini kaBhekuzulu, unobuhle waKwaNongoma ongenele uMiss Teen Commonwealth South Africa, ongonyaka ozayo.
UNomfanelo Zulu (19), waseNdlunkulu kaZulu, ucelelwe amavoti njengoba kade kunoMkhosi woMhlanga ngempelasonto esigodlweni seSilo eNyokeni KwaNongoma - naye abeyingxenye yawo.
Njengamanje le ntokazi yenza uGrade 11 eVelangaye High School, eNkandla. ISilo sithe: “Ukuphumelela kukaNomfanelo kuzobe kusho ukuphumelela kwenu zintombi zomhlanga. Ngeyenu le nto kakuyona eyami, izophakamisa ifulegi lenu njengezintombi zoMhlanga.
"Ngiyafisa ukuba nimvotele nonke, aphumelele.” UNomfanelo uthi ukhule ethanda ukumodela, kanti uthi lo mkhakha ungaholela ekubeni abe ngumethuli wezinhlelo kumabonakude, akhangise ngezimpahla agcine ehambela amanye amazwe.
Uthi uma eqeda uGrade 12, uzoyokwenza izifundo zePharmacy, aqhubeke nomkhakha wakhe wobunobuhle.
“Ngingenele lo mncintiswano ngokubona kwiFacebook. Ngigcwalise imininingwane yami ngoba ngizibona ukuthi ngingakwazi ukuba yinxusa likaMiss Commonwealth Teen SA.
"Ngicela abantu ukuba bangivotele ngokuthumela umqhafazo onegama lami, bathi; Nomfanelo Zulu ku: 35554. Umqhafazo ubiza u-R3 umunye, “kusho le ntokazi.
Ngaphandle kokucelela uNomfanelo amavoti, ngeSonto ngesikhathi kuphethwa uMkhosi woMhlanga. ISilo sivale nokuthi izintombi zimbathe amabhayi anobuso baso kulo mkhosi.