Imvunge ngophenyo lwehholo lwezigidi
Kuthiwa i-ANC ikhiphe umyalelo wokuthi mawucindezelwe umbiko
KUNEMVUNGE ngemiphumela yophenyo lukaHulumeni waKwaZulu-Natal, olumayelana nehholo laseMzimkhulu okuthiwa isaduve ehhovisi likaNdunankulu wakulesi sifundazwe, uMnu Willies Mchunu.
ILANGA lihoshe emithonjeni yalo ethembekile ukuthi kade lwaphothulwa uphenyo ngaleli hholo, okubikwa ukuthi lidle ngaphezu kukaR 35 million yize lingakaqedwa, kodwa kuthiwa i-ANC KwaZuluNatal ikhiphe umyalelo wokuthi lucindezelwe ngenxa yokuntenga kwesimo sezepolitiki esifundeni saleli qembu iHarry Gwala.
Imithombo ithi ubuholi be-ANC bunovalo lokuthi ukwethulwa kwale miphumela yophenyo, oluthinta izikhulu ezithile zikaMasipala waseMzimkhulu, kungase kudale olukhulu uqhekeko kwi-ANC eHarry Gwala.
Udaba lwaleli hholo lube sematheni emuva kokudutshulwa kwekhansela laseMzimkhulu, uMnu Sindiso Magaqa, okubikwa ukuthi belizimisele ngokuneka amahlazo ngezimo zenkohlakalo kulo Masipala waseMzimkhulu.
Ephawula mayelana nalo mbiko uMnu Mchunu, uthe: “Uma kunophenyo olwenziwayo, kunezinhlelo nemigudu elandelwayo, kuhlaziywe futhi kubukwe ukuthi luzokwenziwa kanjani. Yilokho-ke esiphezulu kwakho njengamanje.”
Uthe le miphumela kakuyona into abangayethula kunoma ngubani, izothulwa emphakathini uma seyilandelwe yonke imigomo efanele. Okhulumela i-ANC KwaZulu-Natal, uNkk Nomagugu Simelane-Zulu, uziphikile izinsolo zokuthi i-ANC ijube ihhovisi likandunankulu ukucindezela le miphumela.
Uthe beyiqembu kababheki ukuthi udaba luthinta bani, kodwa uma kuwukuthi konke sekuphothuliwe, luyethulwa futhi uma kukhona abathintekayo, babhekane nezono zabo ngoba ukulwa nenkohlakalo kwiANC yinto eseqhulwini.
“Engikwaziyo nje wukuthi undunankulu wathi uzositshela uma ese- qedile ngalo lolu daba njengoba kungelona kuphela olusehhovisi lakhe” kusho uNkk Simelane-Zulu. Uthe bamnikeze izinyanga ezintathu - ezizophela ngokuphela kukaMandulo (September) - undunankulu ukwenza lo msebenzi.
Okhulumela uMnyango wezokuBusa ngokuBambisana nezoMdabu KwaZulu-Natal, uMnu Lennox Mabaso, uthembise ukuthi uzobuyela kuleli phephandaba ngodaba lwaseMzimkhulu, kodwa kuze kwashaya isikhathi sokuloba engaphenduli. Phambilini ILANGA likhuluma neMeya yaseMzimkhulu, uMnu Mphuthumi Mpabanga, ithe kayinankinga ngophenyo kumasipala wayo.