WENQABILE UKUFAKAZA OSOLWA NGOKUBULALA INTOMBI NENDODAKAZI
UNQABE ukungena ebhokisini lofakazi, eNkantolo eNkulu yaseThekwini owesilisa wasoThongathi osolwa ngamacala okubulala intombi yakhe nendodakazi yayo angayizali mhla ka-18 kuZibandela (December) nyakenye.
UMnu Bongani Gumede (30), ubhekene necala lokushaya ngesando abulale isinqandamathe sakhe, uNkz Zinhle Ntuli nengane yaso, uSnothile Ntuli.
Ngalolo suku kuthiwa uMnu Gumede noNkz Ntuli babenengxabano mayelana nokungabuyi (kukammangalelwa) endlini impelasonto yonke yomhla ka-15 kuZibandlela.
Kuthiwa ummangalelwa ubengumuntu ongasebenzi isikhathi eside njengoba ubondliwa ngumufi. Kuvela ukuthi ugcine ethole itoho eSibaya Casino. Kuthiwa ngoZibandlela ubhonasile emsebenzini kodwa wakhetha ukungayi endlini - okuyikho okususe ingxabano.
UMnu Gumede ubebukeka ethukile ngesikhathi esenkantolo. Ibamba lejali, u-Adv Thembelihle Mapipa, litshele uMnu Gumede ukuthi ubhekene namacala obucayi okubulala abafi wabagqiba ehlathini.
Lithe ummangalelwa ukhethe ukuthula angafakazi ecaleni abhekene nalo.
“Ukuthi kawungenanga ebhokisini wathula ubufakazi bakho, lokho ngeke kuvimbe inkantolo ukuba ikhiphe isigwebo sayo. Ukukhetha kwakho ukuthula kakulinikezanga isisindo icala njengoba kushiye ubufakazi bombuso bungaphikisiwe.
“Umbuso ubize ofakazi abayihlanu ebhokisini, kanti bonke bafakaze kahle futhi kawuzange uphikisane nabo.
“Kawuzange unike ummeli wakho imiyalelo mayelana necala kodwa ubulokhu umtshela ukuthi ufuna ibheyili. Izidumbu zabafi zitholakale zigqitshiwe ehlathini, unina wengane utholwe egqitshwe phezu kwayo.
“Ngesikhathi wenza inkomba, uzikhombele wena indawo yesigameko ngaphandle kwengcindezi,” kusho ibamba lejaji.
Umshushisi, u-Adv Vusi Xaba, uthe kuyilungelo lakhe ummangalelwa ukungafakazi kodwa inka-ntolo isale ilenga ngoba kayibu-tholanga ubufakazi bakhe.
Utshele inkantolo ukuthi ubufakazi obuthulwe ngofakazi bombuso bukhomba yena uqobo uMnu Gumede. Icala liyaqhubeka.