INGCUPHE ESITESHINI SOMKHATHI
UVALO ngembotshana okuvela ukuthi ivulekile egunjini elihlala osonkanyezi esikhumulweni-mkhathi ( space station), ebangeni eliwu-402336km ukusuka emhlabeni.
Lokhu kudale ukuba kuvuze umoya osiza osonkanyezi bakwazi ukuphefumula njengathi silapha eMhlabeni. Okuyimpicabadala wukuthi ososayensi kabakakutholi okudale leyo mbobo.
Okuqwebulise amehlo kososayensi beNational Aeronautics Space Administration (Nasa) - lapho kulawulwa khona izinkambo zomkhathi nokwenzeka kulesi sikhumulo - wukubona kwehla umthamo womoya odingwa ngosonkayezi.
Lokhu kubonakale mhla ka-30 kuNcwaba (August) ngesikhathi osonkanyezi abawu-6 belele. Sebevukile, bayalelwe ukuba bahlwaye yonke indawo ukuze bathole imbangela yokuvuza kwalo moya.
Bagcine beyihlonzile imbotshana elinganiselwa ku-2mm esiswini seSoyuz MS-09, okuyigobolondo elise- tshenziswa ngosonkanyezi uma sebebuyela emhlabeni emuva kokuqeda umsebenzi wabo. Osonkanyezi kuthiwa bayinamekile imbotshana leyo njengesibambiso.
Kuthiwa kube kuhle ukuthi kusheshe kubonakale lokhu ngaphambi kokuba labo sonkanyezi abangabaseUnited States of America (USA) - okuhlelwe ukuba babuyele emhlabeni ngoZibandlela (December) 2018.
Okungakacaci wukuthi ngabe le ngozi yenzeke emhlabeni ngaphambi kohambo noma yenzeke khona emkhathini ngoba phela kuthiwa izicucwana zamadwala ezibizwa ngemicrometeorite [okuyizimbumbulwana (ezilinganiselwa ku-0.001mm - 2mm) ezikwazi ukudlula kwingubo-mkhathi yoMhlaba zihamba ngesivinini esikhulu kangangoba ziyakwazi ukuklwebha insimbi ngisho zizincane kangako.
Nakuba kusesekuseni ukuba kushiwo ukuthi ingozi idalwe yini, kodwa kusolwa iphutha komunye wochwepheshe ngaphambi kohambo.