Utholwe elenga umhlengikazi
Isidumbu sakhe sibonwe yisivakashi ebesise-Oribi Gorge
UBONGA ukuthola ithambo lendodakazi yawo umndeni womhlengikazi waseGamalakhe, ePort Shepstone, isidumbu sayo esitholakale sibhajwe ezihlahleni ngeledlule emuva kokuba inyamalale ngoLwesithathu olwedlule iyothenga imoto.
Isidumbu sikaNkz Nelisa Cele (31) kuthiwa sitholwe yisivakashi saseGoli ebesisendaweni ethandwa kakhulu yizivakashi, i-Oribi Gorge, sithwebula izinyoni.
Kuthiwa sibone into ilenga esihlahleni sathi uma sisondela, sabona ukuthi yisidumbu esigoqwe ngezindwangu, silenga esihlahleni.
UNkk Babongile Cele, oyisinganina ( step mother) sikamufi nokhulumela umndeni wakwaCele, ethintwa yiLANGA uthe: “Ngeke ngikwazi ngisho ukuchaza ukuthi isidumbu sakhe sikusiphi isimo kodwa sibonga uNkulunkulu ngalesi sivakashi ebesihambele kule ndawo ngoba besingeke sisithole ngoba besiphoswe eweni.
“Bekubonakala ukuthi nomuntu osiphonsile ubenzela ukuqinisekisa ukuthi kasiyophinde sisithole. Uhambe ngoLwesithathu ekuseni eyolanda imoto abeyithenga kwelinye igaraji.”
Uthi umufi ubenezinyanga eziwu-6 ezithwele, kanti ushiye ingane eneminyaka ewu-13 ubu- dala. Uveze ukuthi ubesebenza eGamalakhe Community Health Centre.
UNgqongqoshe wezeMpilo KwaZulu-Natal, uDkt Sibongiseni Dhlomo, udlulise amazwi enduduzo kulo mndeni, wathi ukubulawa kwesisebenzi so- mnyango wezempilo kubaphatha kabi kakhulu ngoba laba ngabantu abenza umsebenzi obaluleke kakhulu esizweni, wokuhlenga nokunakekela abagulayo.
“Indlela lezi zigameko esezande ngayo, iyasikhathaza kakhulu. Siyazwelana nomndeni wakwaCele kulesi sikhathi esinzima kanti siyacela ukuthi abangaba nolwazi bathintane namaphoyisa ngokushesha,” kusho uDkt Dhlomo esitatimendeni esithunyelelwe abezindaba.
Okhulumela amaphoyisa KwaZulu-Natal, uColonel Thembeka Mbhele, uthe okwamanje bekungakaboshwa muntu, amaphoyisa ayalusebenza lolu daba.