Imenenja kamasipala ikhuculula inkohlakalo
Ithi ifike kumanaphanapha, imali isetshenziswa budedengu
ZIJIKA nelanga, izikhulu eziwu-9 kuMasipala wesiFunda uMzinyathi, njengoba eziwu-7 zikhonjwe indlela kwathi ezimbili zamiswa ngoba zisolwa ngokubhubhudla imali yabakhokhi bentela efinyelela ku-R300 million.
Lezi zikhulu - ILANGA linawo amagama azo, kodwa liqoke ukuwagodla. Kulezi zikhulu kuthiwa kukhona esezikhonjwe indlela, ezinye zacela ukuzisulela ngoba zibona ubucayi bamacala kanti ezinye zazo zisaqula amacala azo.
Phakathi kwamanye amacala abekwe lezi zikhulu, elokuqoka osonkontileka ngendlela okungesiyo. Labo sonkontileka bebegcina bengawenzi umsebenzi, obekuthi uma bewenzile kwesinye isikhathi ungapheli.
Imenenja yalo masipala, eqashelwe ukuzokhuculula, uMnu Sipho Ndabandaba, ikhuluma neLANGA ngoMsombuluko eMzinyathi, ithi ifike kumanaphanapha yinkohlakalo. “Ngifike kunezinkampani ebeziqokelwe ukufaka ama- borehole (amapayipi adonsa amanzi phansi) ukuze abantu bakwazi ukuthola amanzi ngesikhathi sesomiso.
"Uma sesithi siyalandelela, lawo mapayipi kawekho, yize abanikazi bezinkampani bekhokhelwe wumasipala enhle imali, bethi bebewafaka. Ezinye izinkampani beziqokwa ngokungemthetho ukuze kuhlomule abathile kuzona, imisebenzi ebeziqokelwe ukuthi ziyenze zingayenzi.
"Kunemali engango-R13 million okufanele siyikhokhele izinkampani ebese ziqokwe ukwenza umsebenzi, kodwa okuthe sekufanele ziwuqale, izinkontileka zazo zanikwa abanye abantu abebengazange bafake ngisho izicelo zokwenza lowo msebenzi.
"Lezi zinkampani kudingeke ukuba sizinxephezele, ezinye zazo ziyasibopha kugijinywa izinkantolo. Kuliqiniso impela ukuthi kunezimenenja ezimisiwe ngoba sizama ukukhuculula inkohlakalo,” kusho uMnu Ndabandaba.
Uthi yize bekunzima ukusebenza kulo masipala - njengoba bekukuningi obekufanele kulungiswe - kumiswe nezisebenzi eziningi kodwa bayazama ukugcwalisa izikhala zezikhulu kancane, kancane.
“Sesiqashe uMnu Lethu Mthembu ukuba asiphathele uphiko lwakwa- technical services njengoba nakhona kuningi obekungalungile - okubalwa ukuthengwa kwezimoto.
"Ngifike lo masipala ungenazo izimoto ezisesimeni, bewuphila ngokuqasha. Imali ebichithwa ngokuqasha izimoto bekuwuR648 000 ngenyanga. Imishini nayo ibiqashwa, ikhokhelwa imali elinganiselwa kuR1,2 million ngenyanga.
"Manje sizamile ukuthenga izimoto zethu ukunciphisa imali ephuma kunge- nasidingo. Imali yesibonelelo ibiduva, ingasetshenziswa ngenxa yemibango, yilowo nalowo efuna ingene esiswini sakhe, hhayi ezidingweni zomphakathi. Izinto okufanele ngabe zingenisa imali njengokukhokhelwa kwamanzi, abantu bese bengakhokhi, sebelahle ithemba ngalo masipala wethu.
"Sesiyilungisile indlela yokusebenza, abantu sebeyawakhokhela amanzi. Siyawafaka nasezindaweni obese kuphele khona iminyaka engaphumi kompompi. "Ngikhuluma nje, sizobe sivula amanzi eCwaka nasoGunjana, kwezinye izindawo sifaka kabusha amapayipi adonsa amanzi,” kusho uMnu Ndabandaba. Lo masipala unemali oyihlelele ama- learnership okufundiswa ngayo intsha engasebenzi, bese iqashwa yilo masipala ukufaka nokuxhuma amapayipi amanzi, awendle nokubheka amamitha amanzi. UMnu Ndabandaba akamusha kwezomasipala njengoba eke wasebenza oKhahlamba, eDumbe naseMvoti.