LIGULE IMIZUZU EWU-30 LASHONA IKHANSELA
USHAQEKILE umphakathi waKwaShikishela, eMtubatuba ngokushona kwekhansela lakuward 12 kuMasipala waseMtubatuba, okuthiwa libike ukugula isikhathi esingangemizuzu ewu-30, emuva kwalokho laphangalala ngoMsombuluko ebusuku.
Kubikwa ukuthi uMnu Luke Majuba “Gee” Mkhwanazi (64), ( osesithombeni) obephethe le wadi ngethikithi le-Inkatha Freedom Party (IFP), ubuyele kwakhe ngoMsombuluko ntambama njengenjwayelo, kungekho lutho olubi.
Kuthiwa usuke wathi uyolala emuva kokubuka uMuvhango namalungu omndeni wakhe, kwathi uma efika ekameleni wabika ukuthi uzwa isivuvu sokushisa emzimbeni. Uphumile eyochama, wabuya endlini wakhala ngokuphelelwa ngamandla.
Kuthiwa uyalele inkosikazi yakhe ukuba ibize izingane zakhe nabazukulu ezovalelisa ngoba useyabona ukuthi usuyaphuma umphefumulo. Ushonele ezandleni zezingane zakhe ebezizama ukumfaka emotweni, ephuthunyiswa emtholampilo.
Ngaphandle kokuba yikhansela, uMnu Mkhwanazi ubenebhizinisi lokuthengisa ngoju lwezinyosi, enenkampani yonogada eqinisekisa ukuphepha kweziqiwu eziseduze noMtubatuba neMondi Forest ngaphansi kweSmangaliso Wetland Park, engusihlalo weDukuduku Taxi Association, ephethe iKhono Football Club yaKwaShikishela.
UMnu Qhina Mkhwanazi - oke waba yimeya yaseMtubatuba - oyikhansela laku- ward 18, uthe ufe olwembiza ngokudlula emhlabeni kukazakwabo futhi azalanayo naye.
UMnu Zakhele Nyawo okhulumela i-IFP eMkhanyakude - aphinde abe ngusotswebhu kuMasipala waseMtubatuba - uthe iqembu labo lilahlekelwe kakhulu ngoba umufi ubengumholi oqotho futhi enemibono ephusile, enjalo nje engaluthandi udlame.
UMnu Msizi Mkhwanazi ongumfowabo kamufi, ekhuluma egameni lomndeni, uthe umfowabo ubewusizo olukhulu emphakathini nasemndenini wakwabo. “Ugule imizuzu ewu-30 maqede washona. Sizombeka endlini yakhe yokugcina ngeSonto,” kusho uMnu Mkhwanazi.