Ithinta emanonini iLooking for Love
Akakufihli uBuyi ukuthi uyazifela ngocansi
ISAQHUBEKA nokukhonjiswa ema-cinema ifilimu ekhuluma ngempilo yenzalabantu kusukela ekwamukeleni imizimba yayo nokungazenyezi ukuveza imizwa yayo ngokocansi.
Le filimu, i-Looking for Love, ifolose ngezintandokazi zabalingisi okubalwa kuzona uPhindile Gwala obekwi- soapie iMuvhango ngaphambilini edlala indawo kaNonny, uLilian Dube nosomahlaya uCeleste Ntuli noTrevor Gumbi.
Ilandela impilo kaBuyi Dube (Celeste Ntuli), ongowesifazane oneminyaka engu-40 ubudala, okuyisigaba ngolimi lwamanje esibizwa nge- middle life crisis.
Ngokweminyaka kaBuyi, liya lincipha nedamu lokudoba ofishi, siya sincipha nesikhala sokuthola umaqondana.
Uzimele, uphila impilo yesimanje kodwa kumnyama uma kuziwa kwezothando. Nonina, uNkz Dube, akazibekile phansi ngokuhlale emkhumbuza ukuthi makayeke ukuziphathisa okwentsha eneminyaka eko-20, siphelile isikhathi sokudlala.
Nomlingisi ngqangi, uCeleste, uqinisekisile ukuthi ungena shi ekubeni nguBuyi ngokuveza ukuba vulnerable, genuine abuye abe nezikhathi ezikushiya ukitazekile.
Okuqaphelekayo ngale filimu yiziqeshana zayo eziveza ngokungazenyezi ukulangazelela ucansi njengoba engakufihli uBuyi ukuthi uyazifela ngocansi olungenamibandela.
Empeleni lo mlingisi ukushiya umfoma izihlathi uphinde uhleke uqhephuke.
Ngaphandle kokuba ngusomahlaya, ziningi izigigaba uBuyi abhekene nazo kwezobudlelwano nokuthanda imixovo (imithi esetshenziswa ngabesifazane ukuhlanyisa amadoda embhedeni).
Ungena ebudlelwaneni nowesilisa owenza imigilingwanyana yemilingo futhi ozifelayo ngamakati aphinde athandane nowesilisa othanda ucansi ngendlela eyisimanga futhi ochazwa yizinqe ezidudule zikaBuyi. Konke lokhu kumephula umoya uBuyi ekutholeni umaqondana.
Kulokho kudideka, kunomngani uBuyi ayefunda naye esikoleni, uGreg (Trevor Gumbi) ozifelayo ngoBuyi.
Bahlanganiswa wumsebenzi wokusiza uBuyi ukuba ngusomahlaya onohlonze kodwa inkinga wukuthi uBuyi akekho lapho, yena uzifunela uthando qha.
Kuzona zonke izingqinamba abhekene nazo uBuyi, wesekwe wumngani wakhe omkhulu ophila impilo yobukhazikhazi, uPhindi.
“Kuningi okuyisifundo kule filimu, abaningi besifazane abangakufunda ikakhulukazi laba ababeka uthando phambili kunokuba bazithole bona kuqala ukuthi yini ebathokozisayo ngaphambi kokujabulisa omunye umuntu,” kusho uHelen Kuun, oyisikhulu se-Indigenous Film Distribution, okuyiyona ebhekelele ukusatshalaliswa kwale filimu.