UMFUNDI UTHI KAKUMMANGALISI UKUKHULUMA KUKA-DONALD TRUMP
MHLELI: Kakungethusi futhi kakungimangalisi ukuzwa ukuthi uMengameli wase-United States of America (USA), uMnu Donald Trump usegxambukele odabeni lomhlaba eNingizimu Afrika.
UMnu Trump ngumengameli iminwe yakhe ekuzona zonke iziphithiphithi ezenzekayo emhlabeni, ngisho ezingaphathelene nezwe lakhe uyangena kuzo. Nokho kuyangicasula ukufunda ukuthi umholi wezwe elinamandla ngaphezulu kwawo wonke amazwe emhlabeni, usengene kwipolitiki yombangazwe eNingizimu Afrika.
Ukungenela kwakhe lolu daba kusohlangothini lokuzwela abasephuca izwe lethu. Kubikwa ukuthi uMnu Trump uthe iso lakhe libhekisisa ukukhathazeka okungase kwenzeke kubalimi abamhlophe uma abamnyama beqhubeka nokufuna umhlaba abathi ngowabo eNingizimu Afrika.
Masisho ukuthi kakuyena yedwa uMnu Trump okhathazwa wumcabango wokuzokwenzeka ngalolu daba lo mhlaba, cishe bonke abaholi bamazwe aseEurope banomuzwa ofanayo.
Ukuzwela abanikazi bamapulazi kwembeswa ngamazwi okudabukela abantu abamnyama abazobulawa yindlala uma bethatha umhlaba owaqolwa kubo ngabelungu. Lokhu kusho ukuthi abelungu baqola umhlaba wabendabuko ngoba befuna ukubondla. Okukhohlakalayo wukuthi KwaZulu babengekho abantu ababebulawa yindlala ngaphambi kokuthathwa komhlaba wamaZulu.
Indlala nobuphofu ngamasiko atshalwa ngabamhlophe KwaZulu. Kukhona nabajikijela impikiswano ethi abamhlophe bathatha umhlaba owawungenabantu abakhe kuwona. Lokhu bakusekela ngamagama ezindawo njengeLadysmith, iMelmoth, iStanger, iRichards Bay, iDurban, iDundee neGreytown ezibizwa ngabamhlophe.
Bathi lezi zindawo ziwubufakazi bokuthi kwakungekho maZulu ayakhe kuzona. Kabawavezi amagama esiZulu ngoba awubufakazi obehlukileyo bokuthi ayekhona amaZulu ayakhe kulezi zindawo noma eduze kwazo.
Ebhukwini lakhe elisihloko sithi Language Contact, uProfessor Sarah G. Thomason (2001: 16) uthi: Abanikazi bempela bezwe esilazi njengeRepublic of South Africa namhlanje, babekhuluma izilimi zamaKhoisan; babekule ndawo ngisho abahwebi nezinhloli zaseEurope zingakatheleki ngemikhumbi, abaNtu nabo babengakafudukeli eningizimu ne-Afrika nemihlambi yabo yezinkomo. (Thomason, 2001: 16)
Kakuyena yedwa uThomason obhale ngokufika kwabamhlophe eningizimu ne-Afrika, zikhona ezinye izifundiswa ezimhlophe esezibhale kabanzi ngakho. Impikiswano ngombango womhlaba ingebala nangezikhwepha zalabo abasephuca izwe lethu.
UMengameli Trump nabaholi base-Europe bazwela abamhlophe hhayi ngoba bengawazi umlando wokuthi iNingizimu Afrika yilizwe elakhiwe ngokuhlanganisa amazwe amaningi ehlukene.
Lokhu bayazi ukuthi kwenziwa ngabamhlophe ngezikhali. Abaholi base-Europe bayazi ukuthi amaXhosa namaZulu alwa evikela amazwe awo ayephangwa ngabamhlophe. Ukusekela abamhlophe kumi kwipolitiki yebala neyokuthi abantu abamnyama kabakwazi ukuhola amazwe abo. Okudabukisayo ngezinkulumo zokubukela phansi abansundu wukuthi kunamaZulu avumelana nazo.
AmaZulu akubiza ngengozi ukukhuluma ngenkululeko yezwe lethu. La maZulu ayakuvuma ukuthi thina maZulu kasikwazi ukuzihola.
Ingozi enkulu esibhekene nayo ngamaZulu azohlangana nalabo abasekela abamhlophe. Ngakho-ke amaZulu adingida udaba lokubuyiswa komhlaba mawaqhubeke, liyezwakala izwi lawo. Malikhululeke elamaZulu lizimele ngokwalo. Noma yini engase yenzeke, malikhululeke izwe lamaZulu.